Liven Dek

Miguel Gutiérrez Adúriz
Miguel Gutiérrez Adúriz (ps. Liven Dek) en 2012
Persona informo
Naskonomo	Miguel Gutiérrez Adúriz
Aliaj nomoj	Liven Dek, María Zocato Díez, Svena Dun
Naskiĝo	1950 en Kantabrio,  Hispanio
Lingvoj	Esperanto • hispana
Nacieco	hispano
Ŝtataneco	Hispanio
Okupo
Okupo	esperantisto

Liven DEK [prononcata esperante] aŭ María Zocato Díez, aŭ Svena Dun kaj pluraj aliaj, estas pseŭdonimoj de Miguel GUTIÉRREZ ADÚRIZ (naskiĝis en 1950 en Kantabrio, Hispanio) estas hispana Esperanto-verkisto, -tradukisto, -vortaristo, -eldonisto kaj membro de la Ibera Skolo (esperanta literatura skolo). Li estas eksmembro de la Akademio de Esperanto post sia demisio la 4-an de januaro de 2013, kaj nuna sekretario de la komisiono de Belartaj Konkursoj de UEA ekde 2016.

Vivo kaj esperanta agado

Gutiérrez estas kemia inĝeniero, kiu lernis Esperanton kiam li estis 19-jara. Li eldonas la scienc-fikciajn seriojn Sferoj, Orbito nula kaj Future, kaj diversajn verkojn de aliaj aŭtoroj pri aŭ en Esperanto.

Ĝis 2005 li estis redaktoro de la organo de Hispana Esperanto-Federacio Boletín. Li kunlaboris kaj kunlaboras en pluraj revuoj, ekzemple en Monato kaj Literatura Foiro, kaj gajnis premiojn en literaturaj konkursoj. Li verkis lernolibron por hispanlingvanoj kaj vortaron esperantan-hispanan kaj hispanan-esperantan.

Verkaro (elekto)

Tradukoj

• Astura Bukedo (kun Fernando de Diego, Jorge Camacho, 1988)
• La stultaj infanoj, de Ana María Matute (infanlibro, 1988)
• Platero kaj mi, de Juan Ramón Jiménez (2009)
• Ombroj sur verda pejzaĝo de Manuel Llano, (kun Fernando de Diego, 2012)

Noveloj kaj romanoj

• Ekstremoj (kun Jorge Camacho, Miguel Fernández kaj Gonçalo Neves, 1997)
• Kontribuis al Mondoj 2001 (2001) kaj al pluraj volumoj de Sferoj
• Ne ekzistas verdaj steloj (60 mikronoveloj kun suplemento, 2012)
• Ĉiuj steloj etas nokte (kune kun aliaj aŭtoroj, 2021)

Poemaroj

• Ibere libere (kun Jorge Camacho, Miguel Fernández kaj Gonçalo Neves, 1993)

Lernolibroj kaj vortaroj

• Esperanto - Curso del idioma internacional (1995)
• Esperanto - Curso básico (2012)
• Vortaro 2002 (2002)
• Diccionario - Amika - Vortaro (2007, 2010, 2013, 2018)

Recenzoj

Pri Esperanto - Curso del idioma internacional

„ La konata esperanto-eldonisto Miguel Gutiérrez Adúriz, el Santander, prezentis dum la pasinta HEF-Kongreso en Salou sian ĵus eldonitan lernolibron por hispanlingvanoj Esperanto. Curso del idioma internacional. La nova libro (118-paga kaj 23 centimetrojn alta) furore sukcesis kaj iĝis la plej vendata dum la kongreso-tagoj. Kontraste al la bonega verko de Fernando de Diego Nuevo método de esperanto para clases y autodidactas, la lernolibro de Gutiérrez Adúriz adresigas al veraj komencantoj sen antaŭa scio de nia lingvo, kvazaŭ-ŝtupo kaj komplemento de Nuevo método. La verkon konsistigas dek ok lecionoj, kies skemo jenas: gramatikaj klarigoj kun abundaj ekzemploj, traduk-ekzercoj, legaĵoj kaj konversaciado. Post la lecionaro trovigas pluraj apendicoj: prefiksoj kaj sufiksoj, tabelo de korelativaj vortoj, vortaretoj esperanta-hispana kaj hispana-esperanta (kun ĉiuj vortoj aperintaj en la kurso), ĝenerala enhav-tabelo kaj laŭtema indekso. Ĉu vi foje renkontis amikon, kiu interesiĝas pri esperanto kaj petas lernolibron por mem lerni? Certe jes, kaj vi eble ne sciis kion fari: ja tiel eksmodas niaj kutimaj lerniloj! Se entute ne paroli pri la (mal)kapablo de la verkintoj... Jen do tiu sopirata verko: finfine vera lingvo-kompetentulo konceptis elementan esperanto-lernolibron kun modernaj desegnoj, glacea papero, solida bindo, agrabla tipografio, kaj tre bela ekstera aspekto -eble pli ol multaj alilingvaj lernolibroj- kaj ĉio kontraŭ malpli ol mil pesetoj! Se ĉi tio estus reklamo Esperanto. Curso del idioma internacional, ni ne hezitus rekomendi ĝin kiel Krist-naskan donacon por amikoj, familianoj ktp. kiuj interesigas pri memlernado de esperanto. Feliĉe, tio ĉi ne estas reklamo. ” — La Redakcio. Boletín n323 (okt 1995)

Verkoj pri li

• La Deka Logo estas libra omaĝo verkita de pluraj verkistoj el Esperantujo.

Bibliografio

• 2008: Sutton, Geoffrey. Concise Encyclopedia of the Original Literature of Esperanto 1887-2007 (CEOLE). Novjorko: Mondial 2008, p. 486-488 k.a.

Eksteraj ligiloj

• Vortaro Amika (2007)
• Retejo de Gutiérrez en Ipernity
• en 8-minuta filmo Liven Dek prezentas, en la Urba Teatro de Arundo (Ronda), sian monologon "Konsilu min, doktoro Zamenhof", kadre de la 73-a Hispana Esperanto-Kongreso en majo 2014 (esperante)
• Libroj Arkivigite je 2015-05-18 per la retarkivo Wayback Machine de kaj pri Miguel Gutiérrez en la Kolekto por Planlingvoj kaj Esperantomuzeo Arkivigite je 2007-12-21 per la retarkivo Wayback Machine
• Artikoloj de kaj pri Miguel Gutiérrez en Elektronika Bibliografio de Esperantaj Artikoloj (EBEA) (serĉu je "liven" en ĉiuj kampoj)
• artikolo Liven DEK en la retejo esperanto.net
• Ekstremoj
• Ibere libere