Esperanta Vikimanio

El Vikipedio, la libera enciklopedio
Saltu al: navigado, serĉo
Ĉi tiu artikolo estas verkita en Esperanto-Vikipedio kiel la unua el ĉiuj lingvoj en la tuta Vikipedia projekto.
Konkluda diskuto dum Esperanta Vikimanio
Solenaĵo omaĝe al 10-jariĝo de Vikipedio en Esperanto
Ĉi tiu artikolo temas pri la esperantista renkontiĝo. Por la renkontiĝo de ĉiulingvaj vikipediistoj vidu Vikimanio.

Esperanta Vikimanio estis internacia renkontiĝo de uzantoj de la Vikipedio en Esperanto, esperantlingva versio de la interreta enciklopedio Vikipedio. Ĝi okazis de merkredo la 26-a ĝis dimanĉo la 30-a de oktobro 2011 en Svitavy (Ĉeĥio), omaĝe al la dekjariĝo de la Vikipedio en Esperanto (fondita en novembro 2001). Partoprenis proksimume 80 personoj[1] el 9 landoj.[2] Similan renkontiĝon de uzantoj de ĉiuj lingvaj versioj de la Vikipedio organizas jam ekde 2005 ĉiujare la Fondaĵo Vikimedio sub nomo Wikimania.

Organizintoj[redakti | redakti fonton]

La renkontiĝon organizis Ĉeĥa Esperanto-Asocio (iniciatinto de la ideo Pavla Dvořáková kun edzo Vladimír Dvořák) kunlabore kun aktivuloj de la organizo E@I (ĉefe Marek Blahuš kaj Yves Nevelsteen). Lokaj kunorganizantoj estis Klubo de geamikoj de Esperanto Svitavy, precipe ties prezidantino kaj ĈEA-vicprezidantino Libuše Dvořáková, kaj Gimnazio Svitavy. La aranĝo okazis kun financa subteno de la urbo Svitavy kaj de Regiono Pardubice.

Loko[redakti | redakti fonton]

Chuck Smith antaŭ la salono Chuck

La aranĝon gastigis en ejoj de la Gimnazio Svitavy (Gymnázium Svitavy), studenta domo de la komerca akademio kaj ekonomika altlernejo (Domov mládeže Obchodní akademie a Vyšší odborné školy ekonomické), kaj la Esperanto-Muzeo en Svitavy (situanta en la Domo de Ottendorfer sur la ĉefa urba placo). La partoprenantoj loĝis en la studenta domo kaj por precipe vesperaj aktivaĵoj uzis unu el ties salonoj, honore nomitan "salono Chuck" laŭ la fondinto de la Vikipedio en Esperanto (kaj parodie al la tradicia ĉefsalono Zamenhof dum la Universala Kongreso de Esperanto).

Programo[redakti | redakti fonton]

Pavla Dvořáková prelegas

Komence de la renkontiĝo, ĵaŭde la 27-an de oktobro la partoprenantoj estis solene akceptitaj ĉe la urbestro de Svitavy, sinjoro David Šimek. Sekvis tuttaga vikipedia trejnado ĉe komputiloj por kaj progresintoj kaj komencantoj (inkluzive lokan neesperantan publikon), okazis prelegoj (ne nur pri Vikipedio mem) kaj kunvenis specialaj laborgrupoj.

Solena prelega kaj muzika programo ("matineo") omaĝe al dekjariĝo de la Vikipedio en Esperanto okazis vendrede la 28-an de oktobro en kultura salonego de la Domo de Ottendorfer kaj sekva tosto en Esperanto-muzeo troviĝanta en teretaĝo de la domo. Pro la fakto ke tiu tago samtempe estas la nacia festo de Ĉeĥio (fondiĝo de la respubliko Ĉeĥoslovakio en 1918) en kiu oni ne laboras, ankaŭ multaj ĉeĥaj esperantistoj povis alveni kaj partopreni la programon tiutage.

Sabata posttagmeza ekskurso la 29-an de oktobro gvidis al la urbo Litomyšl kaj ties kastelo, inkluzive de omaĝo super la tombo de Karel Píč.

Partoprenintoj[redakti | redakti fonton]

Formale al la aranĝo aliĝis kaj almenaŭ du tagojn ĝin partoprenis 33 esperantistoj;[3] aldone al ili proksimume 15 personoj partoprenis la ĵaŭdan trejnadon kaj proksimume 35 pliaj ĉeĥaj esperantistoj alvenis por partopreni la vendredan solenan programon. Sume do la Esperantan Vikimanion vizitis proksimume 80 personoj.[1] La partoprenintoj venis el Ĉeĥio, Slovakio, Pollando, Germanio, Hungario, Nederlando, Belgio, Francio kaj Usono.[2]

Prelegoj[redakti | redakti fonton]

La Esperantan Vikimanion ĉeestis kaj prelegis dum ĝi interalie:

Referencoj[redakti | redakti fonton]

  1. 1,0 1,1 La nombroj pri partoprenintoj baziĝas parte sur la interreta listo de aliĝintoj kiu aperas ĉe Jam aliĝis (kie en la ĉefa listo enestas 33 personoj) kaj precipe sur taksoj ricevitaj de la organizinto Vladimír Dvořák, laŭ precizigo de la ĉeforganizintino kaj lia edzino Pavla Dvořáková (laŭ kiu ne nepre mendo de loĝado, sed pli ol unu-taga partopreno estas decida).
  2. 2,0 2,1 Tiuj ĉi landoj aperas en la interreta listo de aliĝintoj ĉe Jam aliĝis kaj estis eksplicite konfirmitaj de la organizinto Vladimír Dvořák.
  3. Esperanta Vikipedio festis sian dekjariĝon dum Vikimanio

Vidu ankaŭ[redakti | redakti fonton]

Kadre de la matineo eksonis ankaŭ Sonatino en a minor de Jiří Antonín Benda

Eksteraj ligiloj[redakti | redakti fonton]

Studenthejmo de la ekonomia mezlernejo en Svitavy, kie okazis parto de la programo

Tekstoj de prelegoj[redakti | redakti fonton]

Raportoj post la aranĝo[redakti | redakti fonton]

Televid- kaj radioelsendoj[redakti | redakti fonton]

Artikoloj[redakti | redakti fonton]

Fotogalerioj[redakti | redakti fonton]

Intervjuo por Ĉeĥa radio
Intervjuo por slovaka programo de Ĉeĥa radio

Anoncoj antaŭ la aranĝo[redakti | redakti fonton]