Esperanto-Asocio de Skotlando
La Esperanto-Asocio de Skotlando (EAS) fondiĝis en 1906, sub la nomo Skota Federacio Esperantista, sed lokaj kluboj de Esperanto-parolantoj jam ekzistis en Glasgovo kaj Edinburgo depost 1903. Ĝi alinomiĝis en 1997. La EAS havas la plej altan kongresnumeron en Esperantio, ĉar ĝi okazigis kongreson ĉiujare, eĉ dummilite. Nuntempe la ĉiujara kongreso normale okazas en junio. La 103a Skota Kongreso de Esperanto okazis en Inverness en 2008, la 104a en Dundee en 2009, la 105a en Berwick-upon-Tweed en 2010. La 106a okazos en Lockerbie de la 10a ĝis la 13a de junio 2011, kaj la 107a okazos en Edinburgo de la 20a ĝis la 23a de aprilo 2012 kune kun kaj samtempe kiel la 93a kongreso de la Esperanto-Asocio de Britio. La revuo de EAS, Esperanto en Skotlando aperas dufoje en la jaro. Ĉiujare la EAS organizas la Skotan Aŭtunan Studrondon en septembro kiu dum multaj jaroj okazis en la urbeto Dunblane sed nun okazas en Glasgovo.
