Fengŝuo
Fengŝuo (el la ĉina fēngshǔi, siavice el fēng [vento] kaj shǔi [akvo]) estas la pseŭdoscienco aŭ arto esplori, konstati kaj klarigi la topografian (mal)bonecon kaj (ne)taŭgecon de loko por konstruado de loĝejo(j) por homoj aŭ tombejo por mortintoj.
[redakti] Lingva noto
En la romano "Ĉe akvorando", unua volumo, p. 547, la tradukinto Laŭlum difinas fengŝuon, tamen esperantigas ĝin per la kunmeto "vento-akvo": "Li petis tranokti en mia domo kaj asertis, ke li lertas pri juĝo de jino-jango kaj vento-akvo".
En Esperantujo oni uzas ankaŭ la formon ventakviko.
Kvankam en la angla kaj hispana lingvoj oni emas uzi nuntempe la formojn fengshui aŭ feng shui, oni ankaŭ tradukas la ideon respektive per geomancy kaj geomancia. Oni tamen ne konfuzu fengŝuon kun la aŭgur-arto geomancio.
