Flugkompania voksignalo
Voksignalo (angle call sign, france indicatif) laŭ la reguloj de la Internacia Telekomunika Unio (ITU) servas kiel identigilo de radi-komunika mesaĝejo - ekzemple flughavena centralo, aviadilo aŭ oceana ŝipo. Voksinalo konsistas el specifa kombino de literoj kaj numeroj; en la internacia radia komunikado la literoj de voksignalo devas esti nomataj laŭ internacia literuma alfabeto.
La specifa kombino de literoj kaj ciferoj, kiu konsistigas voksignalon, kreiĝas laŭ difinitaj skemoj. La unuaj karaktroj estas prefikso indikanta la naciecon de la radi-komunika mesaĝejo. Tiuj prefiksoj estas difinataj de la ITU kaj atribuataj en blokoj al la unuopaj ŝtatoj. Kutime la prefikso estas du karaktroj el kiuj almenaŭ unu estas litero. Iuj aparte grandaj ŝtatoj rajtas uzi prefiksojn el nur unu karaktro kaj nur en tre esceptaj kazoj uziĝas tri karaktroj.
Por pli bona diferencigo la diversaj grupoj de radi-komunikaj mesaĝejoj ricevas voksignalojn laŭ malsamaj skemoj:
| skemoj de voksignaloj por diversaj grupoj de radi-komunikaj mesaĝejoj (elekto) | |
| grupo | strukturo de voksignalo |
| nemoveblaj mesaĝejoj (ekz. en flughavenoj, havenoj, policejoj, fajrobrigadejoj...) | NNA, NNA9, NNA99, NNA999 |
| moveblaj maraj (ŝipaj) mesaĝejoj | NNAA, NNAA9, NNAA99, NA999, NNA9999 |
| moveblaj aeraj (aviadilaj, helikopteraj) mesaĝejoj | NNAAA, NAAAA, N9999 (estas ankoraŭ pliaj ebloj) |
| moveblaj teraj mesaĝejoj (ekz. veturiloj policaj, fajrobrigadaj, medicinaj...) | NA9999, NNA9999, NNAA9999 |
| neprofesiaj mesaĝejoj | NN9A, NN9NA, NN9NNA, NN9NNNA, A9A, A9NA, A9NNA, A9NNNA |
| (N = litero aŭ cifero, A = litero, 9 = cifero). El la unuaj du karaktroj almenaŭ unu estas litero; kutime la ciferoj 0 kaj 1 ne rajtas sekvi post litero (ĉar skribe eblus konfuzi ilin kun la literoj O respektive I). | |
La voksignaloj estas distribuataj de la koncernaj naciaj ŝtataj administrejoj, konsiderante la internaciajn regulojn kaj la internacie difinitajn naciajn prefiksojn. Por laŭeble eviti miskomprenojn, oni ne atribuas ĉiujn eblajn kombinojn de karaktroj.
