Internacia Esperanto-Semajno de la Kulturo kaj Turismo
La Internacia Esperanto-Semajno de la Kulturo kaj Turismo estas esperantista renkontiĝo kiu okazadas ĉiujare en diversaj urboj de la marbordo de Katalunio, organizata de grupo de aktivuloj de la Kultura Asocio Esperantista (KAE)
Historio
La unua Semajno komenciĝis la jaron 1992, laŭ ideo de kroata samideano Milan Sudec, kiu tiutempe loĝis en Masnou, marborda urbo proksima al Barcelono. La du unuaj Semajnoj okazis, kun ĉirkaŭ 40 aliĝintoj, en la Monaĥa restadejo Borja, en Sant Cugat del Vallés. La financan aranĝon garantiis samideanoj Giordano Moya, Josep Iverns kaj Luis Hernández Yzal. Pri la realiga tasko okupiĝis la Hispana Fervojista Esperanta Asocio en Barcelono, el kiuj s-ano Martí Guerrero estis la vera organizanto.
La tria Semajno jam okazis en Salou, marurbo proksime al Taragono (en tiu okazo kune kaj samtempe kun la Hispana Kongreso de Esperanto). De tiu Semajno ĉeforganizanto estis Luis Serrano, kun Santiago Torné kaj poste Salvador Aragay, Francesc Mas kaj Antonio Martínez.
Dum la lastaj jaroj la aliĝado pligrandiĝis kaj oni atingis ĝis ĉ. 150 aliĝoj. Venas esperantistoj el diversaj landoj, sed precipe el Eŭropo, kun granda proporcio el Francio.
Listo de Semajnoj
Lokoj gastigantaj la Internacian Semajnon:
Nombro | Jaro | Urbo | Provinco |
---|---|---|---|
1-a | 1993 | Sant Cugat del Vallés | Barcelono |
2-a | 1994 | Sant Cugat del Vallés | Barcelono |
3-a | 1995 | Salou | Taragono |
4-a | 1996 | Calella | Barcelono |
5-a | 1997 | Sant Carles de la Rápita | Taragono |
6-a | 1998 | Calafell | Taragono |
7-a | 1999 | Cambris | Taragono |
8-a | 2000 | Blanes | Ĝirono |
9-a | 2001 | Lloret de Mar | Ĝirono |
10-a | 2002 | Cambrils | Taragono |
11-a | 2003 | Santa Susana | Barcelono |
12-a | 2004 | Salou | Taragono |
13-a | 2005 | Calella | Barcelono |
14-a | 2006 | La Pineda | Barcelono |
15-a | 2007 | Tossa de Mar | Ĝirono |
16-a | 2008 | Salou | Taragono |
17-a | 2009 | Pineda de Mar | Barcelono |
18-a | 2010 | Coma-ruga | Taragono |
19-a | 2011 | Malgrat de Mar | Barcelono |
20-a | 2012 | Cambrils | Taragono |
21-a | 2013 | Lloret de Mar | Ĝirono |
Organizado
La Semajno de la Kulturo kaj Turismo ĉiam okazas en aŭtuno, en lokoj turismaj, sed en periodo kiam la hotelprezoj estas pli moderaj. Oni uzas hotelon samtempe por la loĝado kaj por la disvolvo de organizaĵoj.
Oni ĝenerale programas prelegojn, ekskursojn, kurson de Esperanto, folkloran vesperon, du interkonajn vesperojn kie ne mankas ĉampano (marko "Esperanto") kaj aliaj frandaĵoj, la fama kataluna muziko "Habaneras" kun la "cremat" (rumo bruligita kun iuj speciaĵoj, kiel povas estis la kafo-grajnoj)
En la lastaj jaroj dum tiu semajno estas anoncata kaj havigata la Premio Ada Fighiera-Sikorska.