Postkomunismo
La vorto postkomunismo signas la fazon post la epoko de komunismo en ŝtatoj, kiuj libervole aŭ devige estis subigitaj al tiu politika doktrino. Inter tiuj ŝtatoj estis la 15 respublikoj de Sovetunio kaj multaj pliaj ŝtatoj, kiuj en Eŭropo kaj Azio estis sub politika kontrolo de Sovetunio, kaj en aliaj partoj de la mondo estis forte subtenataj de la sovetunia gvidantaro. Plej multaj el tiuj ŝtatoj iĝis postkomunismaj post la pacaj revolucioj de la jaroj 1989 ĝis 1991 kaj post la sekva malfondo de Sovetunio.
En tiuj landoj okazis kaj daŭre okazas ampleksaj penoj pri demokratiigo. La sociaj evoluoj estas akompanataj per drastaj ekonomiaj ŝanĝiĝoj, kies malavantaĝaj flankoj estas povreco, senlaboreco kaj socia senradikiĝo de kompletaj (laŭ la ŝtato pli aŭ malpli grandaj) sociaj tavoloj. Tiuj malavantaĝaj flankoj de la demokratiiĝo estas forte kontraŭbatalataj, sed ĝis nun neniel superataj.