Tsvi Sadan
Tsvi SADAN, hebree צבי סדן (naskiĝis kiel Tsuguja Sasaki, japane 嗣也 佐々木, la 15-an de marto 1963 en 由利本荘市 (Jurihonĝō), gubernio Akita, Japanio) estas japandevena israela lingvisto, ekde 2013 membro de la Akademio de Esperanto. Ekde 2004 li loĝas en Israelo. Li doktoriĝis pri hebrea lingvistiko ĉe la Hebrea Universitato de Jerusalemo, kaj estas postenrajta supera docento pri hebrea lingvistiko ĉe la Universitato Bar-Ilan. Lia intereso fokusiĝas pri la moderna hebrea, la moderna jida, Esperanto, morfologio, leksiko, kontaktlingvistiko, socilingvistiko kaj onomastiko. Pri la moderna hebrea li prelegis kaj skribis multe en kvin lingvoj (Esperanto, la angla, japana, jida kaj la hebrea mem). Tsvi Sadan estas membro de la komitato pri hebrea lingvistika terminologio ĉe la Akademio de la Hebrea Lingvo en Israelo.
Fontoj
- Tsvi Sadan, prezento en la prelega libreto de la IKU 2011, paĝo 32 (dokumento en formato PDF)
- persona profilo (angle) en la retejo google-sites