Kiril Velkov
| Kiril Velkov | |
|---|---|
| Persona informo | |
| Naskiĝo | 30-an de novembro 1943 |
| Morto | 24-an de februaro 2001 (57-jaraĝa) |
| Lingvoj | Esperanto |
| Ŝtataneco | Bulgario |
| Okupo | |
| Okupo | esperantisto |
Kiril VELKOV (naskiĝis 1944, mortis 24-an de februaro, 2001), estis bulgara esperantisto, verkisto, astronomo kaj honora membro de Bulgara Esperanto-Asocio (BEA).
Li estis denaska esperantisto kaj aktivis movade ekde la fino de la 50-aj jaroj, unue en sia studlando Sovetio, poste en la hejmlando.
En 1990 li elektiĝis kiel vicprezidanto de BEA kaj de 1993 kelktempe funkciis kiel ĉefredaktoro de Bulgara Esperantisto. Kun Hektor Alos i Font li redaktis duvoluman krestomation kun perfektigaj legaĵoj, Ek al Leg'!, kaj la furoran vortareton Tabuaj vortoj en Esperanto (ambaŭ 1991).
Kun Ljubomir Trifonĉovski li aŭtoris la lern-helpilon Esperanto por komencantoj (1994) kaj la pupteatraĵon La ovo (1987). Li redaktis multajn librojn kaj bultenojn, tradukis el la rusa, ukraina kaj bulgara en Esperanton, gvidis naciajn kaj regionajn E-kursojn.
Elstara astronomo, li ofte prelegis pri sia fako kaj aliaj temoj en E-aranĝoj, i.a. en la 76-a UK 1991 en Bergeno kaj regule en la Internacia Somera E-Universitato en Veliko Tarnovo, kies okazigon li fervore subtenis. Li merite agis por starigi bulgaran filion de Akademio Internacia de la Sciencoj.