Ĥalid bin Abdul-Aziz Al Saud

El Vikipedio, la libera enciklopedio
Jump to navigation Jump to search
reĝo Ĥalid en 1978

Ĥalid bin Abdul-Aziz Al SaudĤalid ibn Abd al-Aziz Al Saud (arabe خالد بن عبد العزيز آل سعود , latinliterigo laŭ DMG Ḫālid ʿAbd al-ʿAzīz Āl Saʿūd; naskiĝis en 1912; mortis la 13-an de junio 1982) inter la jaroj 1975 kaj 1982 estis la reĝo de Sauda Arabio.

Laŭ la oficiala dinastia naskosinsekvo, li estis la 7-a el 37 filoj de la reĝo Abdul-Aziz bin Saud, fondinto de la reĝlando Sauda Arabio. Lia patrino estis princino Ĝaŭhara Bint Musaid Al-Ĝiluŭi, kaj lia avino patrinflanke venis el la familio Sudairi. Lia pli aĝa frato estis princo Mohamed Bin Abdul Aziz Al Saud.

Lin instruis intelektuloj kaj ekleziuloj en la princa lernejo de la sauda korto. Relative frue lia patro taskigis lin regi la provincon Mekao kaj li tiel povis kolekti politikajn spertojn. La 29-an de aprilo 1964 lia pli aĝa duonfrato Faisal, kiu tiutempe fariĝis sauda reĝo, nomumis lin kronprinco kaj vica ĉefministro. Post la murdiĝo de Faisal li la 25-an de marto 1975 mem iĝis reĝo de Sauda Arabio, kaj akiris la reputacion esti modera, modesta kaj religiema reganto, pli ol la aliaj ĝistiamaj regantoj de la sauda dinastio. Lia simpatio por la dezerta naturo kaj la nomada vivstilo, kun ekstera politiko en kontakto kun sed ne gvide de Usono, kaŭzis ke ankoraŭ nun multaj samlandanoj aprezas lian memoron. Jam baldaŭ post la ekrego, li havis stomakan malsanon, kaj la 13-an de junio 1982 mortis pro forta koratako.

Ĥalid kunvokis multajn konferencojn kaj provis trovi interkonsentojn kaj kun la estroj de najbaraj ŝtatoj kaj kun la samŝtatanoj. Unu el la unuaj regaj agoj estis paca fino de lima konflikto pri oazo inter Sauda Arabio, Omano kaj la Unuiĝintaj Arabaj Emirlandoj. Li estis gvida aktivulo en la kreo de la Golfa Koopera Konsilo en 1981. Malgraŭ sia modera kaj bonvola apero, tamen la reĝo kontraŭis ĉian tendencon pri demokratiigo de la politika sistemo (ankaŭ direkte al konstitucia monarkio).

Sekva reĝo iĝis lia duonfrato Fahd bin Abdul-Aziz Al Saud.

Reĝo Ĥalid dufoje edziĝis.

  • princino Sita Bint Fahd Bin Dhamir (lia unua edzino, la paro diverciĝis longe antaŭ la morto de Ĥalid)
    • filoj: princo Bandar (plej aĝa filo), princo Faisal, princo Fahd, princo Saud kaj princo Saad
    • filinoj: princino Hussa, princino Ĥaŭhara, princino Nuf, princino Ĥaŭhara (II) kaj princino Mudhi
  • princino Tarfa Bint Abdullah Bin Abdul Rahman Al Saud (dua kaj lasta edzino, la paro restis kune ĝis lia morto)
    • filoj: princo Abdulah (dua plej aĝa filo) kaj princo Miŝal
    • filinoj: princino Nura, princino Miŝail kaj princino Bandari