Eĥo de Moskvo

El Vikipedio, la libera enciklopedio
Saltu al: navigado, serĉo
emblemo de la stacio
ĉefredaktisto Aleksej Venediktov en intervjuo kun la usona ministrino pri eksteraj rilatoj Hillary Clinton en oktobro 2009

Eĥo de Moskvo (Эхо Москвы, latinliterigo Eĥo Moskvi) estas rusia radiostacio el Moskvo. Ĝi ekestis en la epoko Glasnost (ruse гла́сность, malfermeco aŭ videbleco) fine de la 1980-aj jaroj, kiam permesiĝis politiko de travidebla kaj malferma konduto de la sovetunia ŝtato al la civitanoj. Kiam en Sovetunio de la gvido de Miĥail Gorbaĉov en 1990 unuafoje permesiĝis neŝtataj amaskomunikiloj, grupo de ĵurnalistoj kun starta kapitalo de 150 000 sovetuniaj rubloj fondis la stacion. La unua programo elsendiĝis la 22-an de aŭgusto 1990. Ke la stacio havas la "radiostacian licencon numero unu", ankaŭ hodiaŭ fierigas la redakcian teamon.

Ĉefredaktisto de la stacio estas Aleksej Venediktov (cirile Алексей Венедиктов).[1] 66 procentaĵojn de la akcioj havas la amaskomunikila firmao ОАО Газпром-Медиа Холдинг ("OAO Gazprom-Media Ĥolding"), filio de la konzerna banko Gazprombank (cirile Газпромбанк)[2] de la energia konzerno Gazpromo. La resto de la akcioj apartenas al la redakcianoj. La redakcia statuto priskribas ke la redakcian direkton de la stacio fiksas nur la ĉefredaktisto, sendepende de eksteraj influoj.

La stacion laŭ takso de aŭgusto 2005 regule aŭkultas 650 000 homoj en Moskvo kaj 1,5 milionoj de homoj en la ĉirkaŭaj regionoj. Laŭ informoj de la rusia ministerio pri gazetaro, radiofonio, televido kaj aliaj amaskomunikiloj, inter la radiostacioj de Moskvo la stacio Eĥo de Moskvo havas la 10-an rangon kun 5 procentaĵoj de ĉiuj radioaŭkultantoj, kaj en tuta Rusio ĝi havas la 13-an rangon kun 2 procentaĵoj de ĉiuj radioaŭkultantoj.

Laŭ la stato de 2016, la stacio Eĥo de Moskvo estas la sola restinta tutlanda radiostacio ne regata per la registaro de Rusio, kiu sekve plu povas raporti sendepende kaj sencenzure. La ĵurnalisto Grigorij Pasko (cirile Григорий Пасько) diris pri la sendependeco de la stacio:

Citaĵo
 Oni permesas ekziston al la stacio Eĥo de Moskvo. Por ke la registaro povas montri ion, kiam leviĝas la demando ĉu en Rusio ekzistas sendependaj amaskomunikiloj. Same ekzistas Novaja gazeta, unusola libera gazeto. Sed ne ekzistas televida stacio raportanta sendepende kaj kritike. Tio estus tro, ĉar la plej granda parto de la loĝantaro atingiĝas kaj manipuliĝas per televido.[3] 
— Grigorij Pasko

Referencoj[redakti | redakti fonton]

Fonto[redakti | redakti fonton]

En tiu ĉi artikolo estas uzita traduko de teksto el la artikolo Echo Moskwy en la germana Vikipedio.