Espero Internacia estas frua usona esperantlingva kantaro. Ĝin kompilis Ann E. Beatty. Oni eldonis ĝin verŝajne ĉirkaŭ 1922. Ĝi estis, ŝajne, kompostita en Italio sed presita en Usono, kaj eldonita favore al orfejo en Iovao, Christian Home Orphanage. Ĝi enhavas 240 kantojn, tute en iom kurioza Esperanto, kun kvarvoĉaj partituroj taŭgaj por kantado kun piana akompano.
La unua kanto en la libro, "Kristo amas la infanetojn", uzas la konatan en Esperanto melodion "Tramp, tramp, tramp", komponita de George Frederick Root ekspluatita de Harrison Hill en "La fluanta tajdo". Supozeble la tradukinto de la tuta kantaro (krom kelkaj de ŝi eble originale verkitaj ?? pecoj) estis Ann E. Beatty.
„ Dum tre multaj jaroj la aŭtoro projektis la eldonon de ĉi tiu libro, kaj mi antaŭrigardis al ĝi kun grandaj esperoj. Pro la longa prokrasto kaj silentado mi timis, ke ĝi neniam vidos la lumon. Fine, jen ĝi! La kosto ĝin eldoni certe estis tre granda,
kaj la laboro ĝin pretigi ne malpli granda.
Sed kvankam ni tre ĝojas vidi tian libron en Esperanto, mi ne povas konscience ĝin rekomendi. La himnoj estas ĉiuj el la speco konata sub la nomo Moody and Sankey, kaj ĉe tiu, al kiu plaĉas tiaj 240 himnoj kum melodioj, muzike senvaloraj tamen en kelkaj rondoj amataj, ili devus ricevi bonvenigon. Bedaŭrinde, preskaŭ ĉiu traduko estas plena de lingvaj eraroj, aŭ
de krudaĵoj, kiujn oni ne povas pardone kovri per la nomo “poezia libereco”. Efektive, por fari kontentigan tradukon de tiaj versoj oni bezonus kapablon preskaŭ superhoman, kaj ĉiuokaze multe pli altan nivelon da poezia sento, ol montriĝas ĉi tie.
Kvar himnoj troviĝas ankaŭ en Himnaro Esperanta, sed eĉ ilin oni presigas kun vortoj aliaj. Kun la plej granda deziro laŭdi la libron, mi devas konfesi, ke nek muzike nek lingve ĝi plaĉas. Se la aŭtoro estus uzinta la monon por presigi muzikan eldonon de la Himmnaro, ŝi estus farinta efektivan servon al la movado. ”
