Flegreaj Kampoj

El Vikipedio, la libera enciklopedio
(Alidirektita el Flegreaj kampoj)
Saltu al: navigado, serĉo
satelita foto
Sulfuraj elvaporiĝoj de la kratero Solfatara

La Flegreaj Kampoj (itale Campi Flegrei [ˈkampi fle'grɛi̯] ~flamantaj kampoj, el la greka flego) estas vulkana areo en suda Italio, kun kalderoj, tio estas kun larĝiĝintaj krateroj. Ĝi situas nordokcidente de Napolo kaj la Vezuvo, ĉirkaŭ la golfo de Pozzuoli, kaj estas densa grupiĝo de dekoj de vulkanaj pintoj, krateroj kaj kalderoj, kun krateraj lagoj (Lago Averno, Lago de Fusaro, Lago de Lucrino). Sur la areo estas konataj pli ol 50 erupciejoj. Plimulto de la areo nun kuŝas sub la marnivelo.

En la Flegreaj Kampoj estas la urbo Pozzuoli kun la apuda kratero Solfatara, kiu estis - laŭ kelkaj romiaj mitoj - hejmo de Vulkano, dio de la fajro.[1]

Geologia historio[redakti | redakti fonton]

Vulkanaj erupcioj en la areo de la nuntempaj Flegreaj Kampoj komenciĝis minimume antaŭ 60mil jaroj[2]; eble antaŭ 160mil jaroj.[3]

La unua grava erupcio (nomata "de la kampana ignimbrito") okazis antaŭ ĉ. 40.000 jaroj[4] kaj estigis grandan kalderon (ĉ.200 km²), kiu entenis ankaŭ la nunan gulfeton de Pozzuoli. La dua granda erupcio (nomata "de la napolaj flavaj tufoj") okazis antaŭ ĉ. 15000 jaroj kaj estigis mezgrandan kalderon (ĉ. 90 km²) en la pli granda.[4]

Poste okazis ankoraŭ erupcioj, sed estis ankaŭ jarmiloj sen vulkana aktiveco (ekzemple inter antaŭ 8200 kaj 4800 jaroj).[2] La lastaj erupcioj okazis en 1198, en Solfatara, kaj en 1538,[5] kiam dum 8-taga erupcio estiĝis la konuso de Monte Nuovo (135 m).

Monte Nuovo, la kratero kreita de la lasta erupcio en la areo, en 1538.

Geografio[redakti | redakti fonton]

Hodiaŭ Kampoj Flegreaj enhavas ĉirkaŭ 32 kraterojn kaj pluajn volkanajn formojn (konusojn, ktp).[5] Kelkaj krateroj enhavas lagojn. La bordoj de la du kalderoj estas nuntempe malklaraj pro la granda kvanto de postaj krateroj.

La plej granda kratero nomiĝas Astroni kaj estas ĉ. 2,5 km² vasta. La plej granda vulkana lago estas la lago Averno, kiu estas ĉ. 0,5 km² vasta.

Notoj kaj eksteraj ligiloj[redakti | redakti fonton]

  1. Laŭ aliaj fontoj, la hejmo de la dio Vulkano estis en la samnoma insuleto aŭ en Etna.
  2. 2,0 2,1 Cronogramma Campi Flegrei (itale). INGV - Osservatorio Vesuviano. Alirita 2015.12.06.
  3. Campi Flegrei - Eruption Details (angle). VOGRIPA. Alirita 2015.12.06.
  4. 4,0 4,1 Campi Flegrei - Storia Eruttiva (itale). INGV - Osservatorio Vesuviano. Alirita 2015.12.06.
  5. 5,0 5,1 Campi Flegrei (angle). Global Volcanism Program. Smithsonian Institution - National Museum of Natural History (2013). Alirita 2015.12.06.