Konklavo 2025

papo Francisko

la Domo de Sankta Marta, vidata de la kupolo de la baziliko sankta Petro

Kardinaloj-elektantoj laŭ kontinentoj

Por la Konklavo 2025 la katolikaj kardinaloj kunvenis en Vatikanurbo la 7-an kaj 8-an de majo 2025 por elekti la posteulon de papo Francisko, mortinta la 21-an de aprilo 2025. Post relative konciza kunvenado de du tagoj kiel 267-a papo elektiĝis la usona kardinalo Robert Francis Prevost, kiu sekve alprenis la papan nomon Leono la 14-a. La antaŭa papo de tiu nomo, Leono la 13-a, mortis en 1903, 122 jarojn antaŭ ol la sekva papo Leono proklamiĝis.

Laŭ la apostola instigo (motu proprio) "Normas nonnullas" proklamita de la papo Benedikto la 16-a en februaro 2013, la papa elekto devas komenciĝi ne pli frue ol 15 kaj ne pli malfrue ol 20 tagojn post la morto de la lasta papo. Ĉar papo Francisko mortis en la paska lundo, la 21-an de aprilo 2025, tio rezultigas komencon de la papa elekto inter la 6-a kaj la 11-a de majo 2025; tamen, kaze ke ĉiuj kardinaloj voĉdonrajtaj jam vojaĝis al Romo, la proceduro eĉ povas komenciĝi pli frue - fine decidiĝis ke ĝi ekzakte ekas la 7-an de majo.

La Domo de Sankta Marta, la oficiala gastejo de Vatikanurbo, situanta tuj najbare al la baziliko de Sankta Petro en Vatikano, jam estis utiligita kiel la loĝejo de la kolegio de kardinaloj dum la konklavoj de 2005 kaj 2013, kaj same ankaŭ servis kiel ejo de la konklavo de 2025: Dum konklavoj, la kardinaloj ricevas ĉambrojn per lotado, kaj ĉiu komunikado kun la ekstera mondo estas fortranĉita. Tamen, la oficialaj diskutoj kaj balotoj kiel tradicie dum konklavoj okazis en la apuda Siksta Kapelo.

Kardinaloj-elektantoj

Ĉiuj kardinaloj pli junaj ol la aĝo de 80 jaroj en la tago kiam la papa ofico iĝis vaka estis elekteblaj partopreni. La 21-an de aprilo 2025, ekzistis 252 kardinaloj, de kiuj 136 estas malpli aĝaj ol 80; 108 (80 procentoj) de la eblaj elektantoj estis nomumitaj kiel kardinaloj fare de papo Francisko. Unu kardinalo sub la aĝo de 80, Angelo Becciu, anoncis nepartoprenon pro financa skandalo aktuala, do restis 135 kardinaloj-elektantoj, kiuj devis elekti inter siaj vicoj la novan papon. El tiuj, 17 estas el Italio, 36 el la resto de Eŭropo, 20 el Nordameriko, 17 el Sudameriko, 18 el Afriko, 23 el Azio kaj 4 el Oceanio - inter ili kompreneble pluraj estas "papigeblaj".

Kardinalo Vinko Puljić el Bosnio kaj Hercegovino anoncis, ke li ne ĉeestos la konklavon pro sanaj kialoj; lia rolo kiel la plej aĝa kardinalo inter la elektistoj tial falis al la sekva plej aĝa kardinalo, Peter Turkson el Ganao. Oni ankaŭ informis, ke kardinalo Antonio Cañizares Llovera el Valencilando, Hispanio same ne ĉeestos, ankaŭ pro sanaj kialoj. Sekve restis 133 efektivaj partoprenantoj de la konklavo.

Spekuladoj pri ebla elektoto

Observantoj de papaj elektoj konsideras kelkajn kardinalojn pli verŝajnaj iĝi papo ol aliaj - tiuj estas la "papigeblaj" kandidatoj. Konsiderante ke la aro de "papigeblaj" kandidatoj estas afero de spekulado de la amaskomunikilaro, la elekto de ne-"papigebla" kardinalo ne estas malofta; lastatempaj kazoj estas Johano la 22-a en 1958 plus Johano Paŭlo la 1-a kaj Johano Paŭlo la 2-a, ambaŭ en 1978. Krome, pro la signifa internaciiĝo de la tuta kolegio de kardinaloj dum la papado de papo Francisko, kiam pli ol 140 ne-eŭropaj kardinaloj estis nomumitaj, kaj la ĵurnalistoj de la brita televida korporacio BBC kaj la de usona magazino Time jam sugestis ke ne-eŭropa venonta papo estos nemalverŝajna. Sed kompreneble, tio estas spekuladoj de ĵurnalistoj, kies profesio estas verki televidajn kaj gazetarajn komentojn kun tiaj aŭguroj. Fine ĉiukaze la spekuladoj pravis.

nomo	ŝtataneco	pozicio dum la konklava tempo	kardinaliĝo	naskiĝdato	aĝo	referencoj
Ambongo Besungu, Fridolin	Demokratia Respubliko Kongo	ĉefepiskopo de Kinŝaso	2019-10-05 (Francisko)	1960-1-24	65	[1] [2] [3]
Arborelius, Anders	Svedio	katolika episkopo de Stokholmo	2017-06-28 (Francisko)	1949-9-24	75	[4] [5]
Aveline, Jean-Marc	Francio	ĉefepiskopo de Marsejlo	2022-08-27 (Francisko)	1958-12-26	66	[6] [7] [8] [9] [10]
Bo, Charles Maung	Birmo	ĉefepiskopo de Jangono	2015-02-14 (Francisko)	1948-10-29	76	[11] [12]
Eijk, Wim	Nederlando	ĉefepiskopo de Utreĥto	2012-02-18 (Benedikto la 16-a)	1953-6-22	71	[13] [14] [15]
Erdő Péter	Hungario	ĉefepiskopo de Esztergom-Budapeŝto	2003-10-21 (Johano P. la 2-a)	1952-6-25	72	[16] [17] [18] [19]
Grech, Mario	Malto	ĝenerala sekretario de la sinodo de la Episkopoj	2020-11-28 (Francisko)	1957-2-20	68	[20] [21]
Hollerich, Jean-Claude	Luksemburgio	ĉefepiskopo de Luksemburgio	2019-10-05 (Francisko)	1958-8-9	66	[22] [23] [24]
Lacroix, Gérald	Kanado	ĉefepiskopo de Kebeko	2014-02-22 (Francisko)	1957-7-27	67	[25] [26]
de Mendonça, José Tolentino	Portugalio	prefekto de la Dicasterium pri kulturo kaj edukado	2019-10-05 (Francisko)	1965-19-95	59	[27] [28]
Ouellet, Marc	Kanado	Neniu (emerita prefekto de la Dicasterium por episkopoj)	2003-10-21 (Johano P. la 2-a)	1944-6-8	81	[29][30]
Parolin, Pietro	Italio	Kardinalo ŝtatsekretario	2014-02-22 (Francisko)	1955-1-17	70	[31] [32][33]
Pizzaballa, Pierbattista	Italio	Latina patriarko de Jerusalemo	2023-09-30 (Francisko)	1965-4-21	60	[34] [35] [36]
Prevost, Robert Francis	Usono	ĉefepiskopo de Albano, prefekto de la Dicasterium por episkopoj	2023-9-30 (Francikos)	1955-9-14	69	[37] [38]
Ranjith, Malcolm	Srilanko	ĉefepiskopo de Kolombo	2010-11-20 (Benedikto la 16-a)	1947-11-15	77	[39] [40]
Sarah, Robert	Gvineo	Neniu (emerita prefekto de la Dicasterium por dia kultado kaj disciplino de la sakramentoj)	2010-11-20 (Benedikto la 16-a)	1945-6-15	80	[41] [42]
Tagle, Luis Antonio	Filipinoj	vicprefekto por la sekcio de unua evangelizado de la Dicasterium por evangelizado	2012-11-24 (Benedikto la 16-a)	1957-6-21	67	[43] [44][45][46]
Tobin, Joseph W.	Usono	ĉefepiskopo de Newark	2016-11-07 (Francisko)	1952-5-3	73	[47] [48]
Turkson, Peter	Ganao	kanceliero de la Papa Akademio de la Sciencoj kaj la Papa Akademio de Sociaj Sciencoj	2003-10-21 (Johano P. la 2-a)	1948-10-11	76	[49] [50]
Zuppi, Matteo	Italio	ĉefepiskopo de Bolonjo	2019-10-05 (Francisko)	1955-10-11	69	[51] [52] [53]