Oene Hoekstra

El Vikipedio, la libera enciklopedio
Salti al navigilo Salti al serĉilo

Nederlanda esperantisto

Oene HOEKSTRA /Une Hukstra/ (1923-1999), Honora Membro de UEA ekde 1988, forpasis la 12-an de marto de 1999 en Schoorl (Nederlando).

Hoekstra ekkonis Esperanton jam kiel 12-jarulo. Du jarojn poste li ricevis ateston de Cseh-kurso, danke al kiu li persvadis sian lernejon starigi E-kurson.

Kiel estro de loka klubo, estrarano kaj prezidanto de Nederlanda Grupo de Geinstruistoj pri Esperanto (NGGE), estrarano de Nederlanda E-Asocio, administranto de korespondaj kursoj kaj multfoja kursgvidanto, li elstare kaj praktike kontribuis al la nederlanda E-movado. Liaj kursoj ĉe la Universitato de Nimego provizis E-organizaĵojn per dekoj da aliĝintoj kaj per postaj aktivuloj.

En julio de 1973, li, kun siaj edzino kaj filo, vizitis Kolombion. Li helpis informi la publikon pri Esperanto-movado, kaj pri la lingvaj problemoj en la Eŭropa Komunumo, per prelego en la Universitato Pontifika Bolivarana de la urbo Medellín. Pri la okazintaĵo aperis raporto en la plej legata loka ĵurnalo.

En 1977 li kunordigis Lernejan Semajnon en Belgio por 166 diversnaciaj infanoj. En 1982 li eklaboris kun prof. Van Els kaj d-ro Knibbeler pri nova metodo de efika fremdlingvo-lernado (La esplor-kreiva vojo, 1996), kiun li prezentis diverslande. En 1987, centjariĝo de Esperanto, li iniciatis kaj lanĉis kampanjon "Esperanto-100", kaj en 1988 li organizis Turisman E-Kongreson en Alkmaar.

En siaj lastaj jaroj li estis ekstera kunlaboranto de la Eldona Fako de UEA: i.a. li kompostis la kompletan Pajleroj kaj stoploj de William Auld.

Hoekstra estis longtempe delegito kaj memhro de Societo Zamenhof, regula mecenato de TEJO kaj de diversaj fondaĵoj de UEA. Ankaŭ ILEI kaj NGGE omaĝis al Hoekstra per honora membreco.