Pri internacia lingvo dum jarcentoj

El Vikipedio, la libera enciklopedio
Saltu al: navigado, serĉo
Pri internacia lingvo dum jarcentoj
Aŭtoro Isaj Dratwer
Eldonjaro 1970
Paĝoj 142
v  d  r
Information icon.svg

Pri internacia lingvo dum jarcentoj

  • kurta skizo: la libro estas esperantlingva libro kompilita de Isaj Dratwer. Ĝi aperis unue kiel modesta proveldono kun 142 p. en 1970. La dua, multe ampleksigita eldono kun XV + 320 p. aperis en 1977.

La 2-a eldono enhavas citaĵojn de ĉ. 800 famuloj el la tuta mondo pri la lingva problemo, pri planlingvoj kaj precipe pri Esperanto. Ĝi estas dividita laŭ klasifiko de la famuloj: filozofoj, verkistoj, sciencistoj, filologoj kaj lingvistoj, kaj aliaj.

La libro estas valora verko, el kiu oni daŭre ĉerpas citaĵojn uzatajn en la informado pri Esperanto. Sed el scienca vidpunkto ĝi estas malbona, ĉar la kompilinto neniel klopodis kritike pridubi la verecon de iuj citaĵoj. Ofte li indikis nur tre malprecizajn fontojn.

Ekzemple pri Albert Einstein li citas la frazon "Esperanto estas la plej bona solvo de la ideo de la lingvo internacia" kun la fontindiko Germana Esperanto-Revuo sen plia precizigo. Tre verŝajne la citaĵo estas nur esperantigo de la titolo de la germanlingva broŝuro de Leopold Einstein "La lingvo internacia als beste Lösung des internationalen Weltspracheproblems"; ĝi do supozeble tute ne venas de Albert Einstein.

Isaj Dratwer asertas ankaŭ, ke Papo Paŭlo la 6-a:

Citaĵo
 en la fino de sia paska mesaĝo en 1967 diris 'Kristo leviĝis' en 10 lingvoj, inter kiuj Esperanto 

sen klopodi kontroli tion per la oficiala vatikana gazeto L'Osservatore Romano (kiu certe ne jam en 1967, sed unuafoje en 1994 menciis paskajn salutojn de papo en Esperanto).

Citaĵo
 Boris Kolker (2004-04-16): Elstara kolekto de eldiroj pri Esperanto, kiun faris multegaj eminentuloj diverslandaj. Uzinda en informado pri Esperanto.