„ Plaĉa albumeto, kun sesdeko da fotoj montrantaj la plej konatajn nunajn Esperantistojn, verkistojn, vortaristojn, administrantojn, recenzistojn, kaj pri ĉiu el ili la poeto verkis laŭdan aŭ informan, aŭ moketan rondelforman poemeton. ”
„ En la libro Rimportretoj ni ree estas ĉe poeto K. 58 fotografaj bildoj; apude malgranda rimaĵo, nomita rondelo, fiksas trafe per kelkaj frapantaj trajtoj eminentajn Esp -verkistojn kaj propagandistojn. — Se la Esperantistaro estas unu granda familio, sekve estas tiaj poesietaĵoj donaco de unu fidela amanta infano al amataj gefratoj. Vivant sequentes! — Ĉiu alia fidela infano mendu tuj la libreton por vide kaj spirite konatiĝi kun eminentaj gefratoj kaj ekĝoji pri la ĉarmaj, spirite spicaj versoj. ”
„ Tre interesaj, kelkfoje malice ironiaj kaj pikaj portretoj pri kelkaj «steloj » de la Esperanta Literaturo. Ne necesas aldoni ke la leganto renkontos stelojn « de diversa grandeco » kaj eble ankaŭ iun aŭ alian pri kies facile atribuita
« stel-eco » li iom miros. ”
„ La satiro ankoraŭ ne trovis ampleksan lokon en nia literaturo. Eĉ en ĉi tiu portretaro, kie oni nepre ĝin atendus, ĝi preskaŭ mankas. “Preskaŭ”— tamen en du-tri rondeloj Kalocsay kuraĝas piki. Ĉar en ili troviĝas iom da gaja malico, tial aparte plaĉis al mi la strofoj pri Barthelmess, Sturmer, Ramboux, kaj —ĉu mi kuraĝu diri ?-— mi mem. Eble en kelkaj aliaj embuskas delikata klingo; ekzemple, en la rondeloj pri —sed mi estu diskreta : mi ne dezirus seniluziigi la personojn kiuj alie eble taksos tute seriozaj la versojn pri ili.
La kolekto estas ĉefe literatura. La gajaj, preskaŭ ĉiam trafaj, aludoj al konataj verkistoj kaj aliaj sendube agrabligos horon al la literaturamanto. De tiu plezuro ne la plej malgrandan parton provizas la teĥnika lerto de la verkinto. Krom tio, estas ĉiam interese havi bonajn fotografaĵojn de la personoj, kiuj gvidas nian movadon aŭ helpas formi nian literaturon. Ĉiu leginto sendube sopiros duan serion da Rimportretoj. ”
