Rumana Akademio
La Rumana Akademio (rumane: Academia Română) estas la plej alta institucio pri scienco kaj kulturo en Rumanio. Ĝi estis fondita en 1866 sub la nomo Societatea Literară Română (rumana literatura societo); nun ĝi havas 181 membrojn, elektitajn por la tuta vivo.
Ĝia sidejo estas en Bukareŝto.
Historio
Laŭ iniciato de Constantin A. Rosetti je la 1-a de aprilo 1866 fondiĝis la Rumana Literatura Societo (Societatea Literară Română). Ĝia unua prezidanto estis Ion Heliade Rădulescu; ĝiaj fondaj membroj venis el ĉiuj regionoj de la lando:
- 7 membroj el la kerna regno: Vasile Alecsandri, Costache Negruzzi, Vasile Urechea-Alexandrescu, Ion Heliade Rădulescu, August Treboniu Laurian, Constantin A. Rosetti kaj Ion C. Massimu, al kiuj en 1867 aldoniĝis Titu Maiorescu kaj Nicolae Ionescu;
- 2 el Banato: Alexandru Mocioni, Vincențiu Babeș;
- 3 el Besarabio: Alexandru Hașdeu, Constantin Stamati, Ioan Străjescu;
- 2 el Bukovina: Alexandru Hurmuzaki, Ambrosiu Dimitrovici (kiun poste anstataŭis Ioan Sbiera);
- 2 el Makedonio: Ioan D. Caragiani, Dimitrie Cozacovici.
- 3 el Transilvanio: Timotei Cipariu, Gavriil Munteanu, George Barițiu;
En 1879 la societo ŝanĝis sian nomon al Academia Română.