Peter Huchel

Literaturo > Germanlingva Literaturo > Peter HUCHEL < Germana Lingvo

---

Peter HUCHEL [pete huĥl] (naskiĝis la 3-an de aprilo, 1903, mortis la 30-an de aprilo, 1981) estis germana poeto.

Naskiĝinte apud Berlino, li pasigis sian junaĝon en kampara regiono. De 1923 ĝis 1926 li studis literaturon kaj filozofion en Berlino, Freiburg kaj Vieno. Ekde 1927 li vojaĝis dum tri jaroj tra Francio, la Balkana Duoninsulo kaj Turkio; reveninte al Berlino li laboris por diversaj literaturaj ĵurnaloj kaj verkis lirikon.

Dum la nazia reĝimo li malmulton verkis; eĉ la publikigon de sia unua poemaro Der Knabenteich li en 1933 preventis. Ekde 1940 li devis militservi.

Post la Dua Mondmilito Peter Huchel laboris en Orienta Berlino ĉe radiostacio. Ekde 1949 li estis ĉefredaktoro de renoma kultur-revuo, sed pro konfliktoj kun politikaj funkciuloj li en 1962 devis forlasi tiun ĉi postenon. En 1971 li fine transloĝiĝis de GDR al FRG. Li mortis en Staufen im Breisgau, Badeno-Vurtembergo.

Listo de verkoj

• Gedichte (poemoj, 1948)
• Chausseen, Chausseen (poemoj, 1963)
• Die Sternenreuse (poemoj verkitaj 1925-1947, eld. 1967)
• Gezählte Tage (poemoj, 1972)
• Die neunte Stunde (poemoj, 1977)

En Esperanto aperis

• Soldata tombejo. - En: La muzino / eld. Rikardo ŜULCO. - Paderborn : Esperanto-Centro, 1992