Hanovro (lando)

Por aliaj signifoj, bv. rigardi la apartigilan paĝon: Hanovro (apartigilo)

1. Elekto-princlando Hanovro (1708-1814) 2. Reĝlando Hanovro (1814-1866)
Plena origina nomo: 1. Kurfürstentum Hannover, Kurhannover 2. Königreich Hannover
←  1708 – 1866  →
Geografio
Ĉefurbo:	Hanovro
Loĝantaro
Nacia konsisto:	germanoj
Lingvoj:	germana
Religio:	luteranismo
Ŝtat-strukturo
Ŝtat-strukturo:	monarĥio, membroŝtato de la Sankta Romia Imperio; de 1714 ĝis 1837 en persona unio kun Britio
Estiĝo:	rangaltiĝo de la duko al princo-elektisto
Pereo:	aneksita de Prusio
Antaŭaj ŝtatoj: Brunsvigo-Luneburgo Postsekvaj ŝtatoj: Reĝlando Prusio Elstaraj historiaj eventoj Diplomatiaj Rilatoj

La lando Hanovro (en Esperanto kelkfoje ankaŭ nomata "Hanovrio") estas historia regiono – kaj portempe memstara lando dinastie ligita kun Britio – en norda Germanio. Ĝia teritorio estas la ĉefa parto de la hodiaŭa federacia lando Malsupra Saksio. Ĉefurbo estis Hanovro.

Antaŭulo de la lando Hanovro estis la duklando Brunsvigo-Luneburgo (Braunschweig-Lüneburg). Ekde 1692 ĝi ankaŭ neoficiale nomiĝis "duklando Hanovro".

En 1708 ĝi rangaltiĝis al "elekto-princlando Hanovro" ("Kurhannover"). La nova princo-elektisto de Hanovro en 1714 heredas ankaŭ la britan tronon kiel reĝo Georgo la 1-a, do tiel la britaj reĝoj havis en la 18-a jarcento kunelektorajton pri la germana reganto. Hanovro kaj Britio havis komunan reĝon de 1714 ĝis 1837.

Post Napoleono la lando ekzistis de 1814 ĝis 1866 kiel memstara "reĝlando Hanovro". En 1866 ĝi estis konkerita kaj aneksita de Prusio kaj ĉesis ekzisti kiel memstara ŝtato. Ĝia teritorio fariĝis prusia provinco, "provinco Hanovro".

Post la Dua Mondmilito la lando Prusio estis malfondita. Per dekreto de la brita militista registaro la lando Hanovro estis restarigita la 23-an de aŭgusto 1949, sed ĝuis nur tre mallongan memstaran ekziston, ĝis kiam alia dekreto la 23-an de novembro samjare unuigis ĝin kun najbaraj landopartoj al la nove kreita federacia lando Malsupra Saksio.