Charente-Maritime

Charente-Maritime
departemento de Francio
Administrado
Lando	Francio
Regiono	Puatuo-Ĉarentoj
Numero	17
Prefektejo	La Rochelle
Subprefektejoj	Jonzac Rochefort Saintes Saint-Jean-d'Angély
Prezidanto de la departementa konsilio	Dominique Bussereau
Prefekto	{{{prefekto}}}
Statistikaĵoj
Loĝantaro	661 404 (2021)
Areo	6 864 km²
Loĝdenso	96 /km²
Subdividoj
Arondismentoj	5
Kantonoj	51
Komunumaroj	25
Komunumoj	472

Charente-Maritime [ʃaʁɑ̃t maʁitim] estas unu el la kvar departementoj de la franca regiono Puatuo-Ĉarentoj. Ĝia areo estas 6 863,8 km² kaj ĝi havis 629 124 loĝantojn en la jaro 2012. La ĉefurbo de la departemento estas La Rochelle; aliaj gravaj urboj estas Rochefort, Royan, Saintes, Saint-Jean-d'Angély kaj Jonzac. La departemento entute havas 472 komunumojn.

La nomo “Charente-Maritime” devenas de la rivero Charente. La adjektivo maritime (“marborda”) estis aldonita por distingi ĝin de la najbara departemento Charente. Ĝi unue nomiĝis Charente-Inférieure, sed tiu nomo estis ŝanĝita en la jaro 1941 pro malfavoraj kunsencoj de la vorto inférieur (“malsupra” aŭ “malsupera”).

Geografio

Aera bildo de la insulo Ré

Charente-Maritime posedas longan marbordon ĉe Atlantiko. Kvar insuloj situas apud la ĉarenta marbordo kaj apartenas al ĝia teritorio:

• la plej granda estas Oléron, turisma insulo atingebla per ponto;
• Ré, en la nordo de la departemento, estas konektita al La Rochelle per ponto;
• Aix estas malgranda insulo inter Oléron kaj la enfluejo de Charente kaj aŭtoj estas malpermesitaj tie;
• Madame estas la plej malgranda, atingebla perpiede de Port-des-Barques kiam maro estas malalta.

La norda parto de la departemento konsistas el vasta ebenaĵo, la centra parto el sinsekvo de valoj kaj montetoj kaj la suda parto konsistas ĉefe el sablecaj nefruktodonaj grundoj.

En la departemento fluas kvar riveroj:

• Charente, kiu fluas meze de la departemento, estas la plej grava;
• Sèvre niortaise, norde, konsistigas la landlimon kun Vendée;
• Seudre estas malgranda marborda rivero;
• Ĝirondo, la granda enfluejo de Garono, estas la limo kun la departemento Gironde.

Plejparto de la loĝantaro koncentriĝas laŭ la marbordo, dum la interna parto perdas siajn loĝantojn.

Administrado

Pli detalaj informoj troveblas en artikoloj Komunumoj de Charente-Maritime, Kantonoj de Charente-Maritime kaj Arondismentoj de Charente-Maritime.

La kvin arondismentoj de Charente-Maritime kun siaj ĉefurboj

Charente-Maritime apartenas al la regiono Puatuo-Ĉarentoj kaj havas landlimojn kun la departementoj Vendée, Deux-Sèvres, Charente, Dordogne kaj Gironde.

Ĝia teritorio estas dividita en:

• 5 arondismentojn: La Rochelle, Jonzac, Rochefort, Saintes, Saint-Jean-d’Angély;
• 51 kantonojn;
• 472 komunumojn.

Ekonomio

Agrikulturo

Agrikulturo ludas, kiel en multaj aliaj francaj regionoj, ĉefan rolon, kaj okupas pli ol 30% el la laboranta loĝantaro: bredado, kultivado de tritiko, maizo, sunfloroj, vinberoj (famaj vinoj estas konjako kaj Pineau), kaj kompreneble fiŝkaptado en la oceano. Charente-Maritime estas la franca departemento, kiu produktas plej multe da mituloj kaj ostroj.

Turismo

Fortikaĵo Bojardo (Fort Boyard), unu el la plej famaj lokoj de Charente-Maritime

La departemento ofertas grandan diversecon de vizitindaĵoj, kaj pro tio ĝi estas grava turisma loko. La marbordo kun siaj insuloj (463 km da marbordo) invitas al ferioj: plaĝoj, sportoj, eblecoj por fiŝkaptado, ekskursado piede, bicikle aŭ rajde, gastronomio kaj vinoj, kultura turismo, vizito de la urbo La Rochelle, romanika arto… La allogaĵoj ne mankas.

Bildoj

• 
  La malnova haveno de La Rochelle
• 
  La insulo Aix
• 
  La preĝejo de Talmont-sur-Gironde
• 
  La lumturo de La Coubre en Les Mathes
• 
  Ponto super Charente en Rochefort
• 
  Remparo de la citadelo Brouage
• 
  Gaŭl-romia areno en Saintes
• 
  Fort Louvois (fortikaĵo en Bourcefranc-le-Chapus) kaj la ponto de Oléron

Vidu ankaŭ

Vidu ankaŭ

• Komunumoj de Charente-Maritime

Eksteraj ligiloj

• Ĝenerala konsilio de Charente-Maritime
• Aktualaĵoj de Charente-Maritime