Ho, mia kor'

Ho, mia kor estas fama poemeto de Zamenhof, verkita nelonge antaŭ eliro de la Unua Libro en 1887.

En tiaj tagoj Zamenhof verkis versaĵon tre mallongan. Ĝi sonas iom kiel spirado malfacila de homo suprenkurinta kvin etaĝojn de ŝtuparo kaj staranta antaŭ pordo halte. (Edmond Privat, Vivo de Zamenhof, paĝo 35.)

Teksto

Ho, mia kor', ne batu maltrankvile,
el mia brusto nun ne saltu for!
Jam teni min ne povas mi facile,
ho, mia kor'!

Ho, mia kor'! Post longa laborado
ĉu mi ne venkos en decida hor'?
Sufiĉe! trankviliĝu de l' batado,
ho, mia kor'!