Negro

Negro (de Hispana negro "nigra, nigrahaŭtulo", siavice de Latina niger "nigra") estas vorto kelkfoje uzata por homo kun bruna aŭ malhelbruna ("nigra") haŭtkoloro. Malgraŭ la nestrikta difino de PIV kaj aliaj vortaroj, tiuj kiuj uzas la vorton kutime ĝin uzas por negroido, homtipo origine el Afriko sed pro sklaveco kaj elmigrado disvastigita al aliaj kontinentoj, ĉefe Amerikoj. Do por ĝusta difino oni ankaŭ devus inkluzivi ankaŭ aliajn fizikajn trajtojn, kiel hartipon. Tre malhelbrunajn melanezojn kaj dravidojn oni nur escepte nomus "negroj". Pro la Eŭropa deveno de Esperanto, esperantistoj tendencis transpreni siajn nacilingvajn uzojn de la vorto, kiuj ofte havis rasismajn subtonojn. En tempo kiam scienco pridubas la koncepton de "homaj rasoj", estas demandinde, ĉu oni entute bezonas tian ĉi vorton. Ĉu estas rasismo aŭ ne havi propran vorton por "nigr(ahaŭt)ulo"? Oni ja ekzemple ne havas vorton "blonko" por "blank(ahaŭt)ulo". Ĉiukaze, la vorto restas uzata, ankaŭ de multaj nigrahaŭtuloj mem.

---

Vidu ankaŭ: Homaj rasoj - rasismo en Esperantujo - negristo