Internacia Televido

Internacia Televido (aŭ ITV) estas interreta televidkanalo en Esperanto. La projekto iniciatata en 2003 de Ĝangalo E-Portalo. En februaro kaj marto 2004 Flavio REBELO, ĉefredaktoro de la retportalo Ĝangalo, prelegvojaĝis en Eŭropo por promocii la projekton inter la eŭropaj esperantistoj. La kanalo montras diversajn programojn esperantlingvajn kiel kinofilmojn, dokumentariojn kaj Esperanto-kursojn.

Oni ne sukcesis kolekti la planitan startan kapitalon (35.000 eŭrojn), sed nur 23.000 eŭrojn. Tamen la iniciatintoj ne nuligis la tutan projekton, sed ekfunkciigis ĝin kun ŝanĝita, iom simpligita formo.

Je 31-a de julio, 2005, ITV komencis elsendi test-signalon kun informo pri la nova servo. Je 5-a de novembro, 2005, ITV ekis. Vidu retpaĝaron.

Originaj planoj

Laŭ la originaj planoj, Internacia Televido funkcius danke al la salajrata laboro de dek profesiuloj - unu ĵurnalisto, tri staĝantoj (ĉiofarantoj), unu teknikisto pri elsendfluo (angle streaming), du reprezentantoj (unu en Usono, alia en Eŭropo), unu direktoro (kiu zorgus pri la kohera integriĝo de la teama laboro), unu fakulo pri videa postmuntado, kaj unu parolisto (precipe, sed ne nur, por la teleĵurnalo). Inter la originalaj prioritatoj ankaŭ estis la kreado de propra studieto, por la filmado de programoj. Inter la skizoj de la televidkanalo, troviĝis ĉiutaga teleĵurnalo kaj multaj aliaj programoj, kiujn oni arigus kiel kvar-hora programaro, kiu alterne elsendiĝus ses fojojn tage, sep tagojn semajne. La ideo estis proponi al la esperantistoj veran televidkanalon, kun malsamaj programoj ĉiutage.

Novaj planoj kun malmulta mono

ITV planas nun anstataŭ disponigi novajn programojn ĉiutage, plej verŝajne ili proponos laogramojn monate aŭ eble dusemajne. Anstataŭ kvar-hora programaro, kiu ripetiĝos kelkajn fojojn tage, oni planas disponigi programojn poparte, tiel ke ĉiu povos spekti la programojn en ajna horo.

Anstataŭ fari teleĵurnalon ĉiutagan, plej eble oni faros ĝin, almenaŭ dekomence, nur unu fojon semajne. Tia Internacia Televido, kiu estis pli frue proponita al la personoj, kiuj legis la informojn en la portalo de la projekto, kaj kiujn oni prezentis dum la prelegoj, ne povas esti lanĉata nun. Tio, kion oni volas lanĉi estas pli modesta semo de tiu, kiu iom post iom konturiĝos cele al la originala ideo.

Ĉe la centro de la propono lanĉi ĉi tiun 'minimumecan' televidkanalon staras la esperantistoj. Tial ke oni ne havos la tutan kapitalon, kiun ni antaŭvidis, la dungado de profesiuloj por labori ĉe la televidkanalo estos restriktita al nuraj tri laboristoj - unu ĵurnalisto, unu staĝanto, unu fakulo pri videa postmuntado.

Anstataŭ havi sian propran studieton, la eta teamo de Internacia Televido luos studiojn malmultekostajn en la urbo San-Paŭlo (sidejo de la televidkanalo kaj de Ĝangalo). Ĉi tio certe ŝparos multe da mono, ĉar oni ne estos tial devigataj dungi teknikiston pri elsendfluo.

ITV lanĉis novan monvarbadon por akiri la necesan monsumon ĝis fino de aŭgusto de 2005. La unua dissendo okazis la 5-an de novembro [1].

Eksteraj ligoj

grekeRetejo de ITV grekeBlogaro de Flavio Rebelo en kiu li raportas tagon post tago pri sia prelegvojaĝo. grekeRaportoj pri prelego en Tuluzo kaj aliaj dokumentoj