Vintra Ciklodromo

Dosiero:Paris map - Vel d'hiv.jpg

Situo de la Vintra Ciklodromo sur mapo de Parizo

La Vintra Ciklodromo (france: vélodrome d’Hiver) de Parizo estis konstruita en 1909 kaj malkonstruita en 1959. Oni familiare nomis ĝin Vél’ d'Hiv’. Ĝi situis sur strato Nélaton, en la 15-a arondismento de Parizo.

Komence de la 20-a jarcento, bicikla kompetado fariĝis amasa spektaklo ŝatata de la laborista popolo de la urboj. Konstruado de ciklodromoj partoprenis al tiu movado. Ekde 1902, Henri Desgrange (ankaŭ kreinto de Tour de France en 1903) petis al arĥitekto Gaston Lambert aranĝi la Galerion de Maŝinoj, restaĵon de la Universala Ekspozicio de Parizo de 1889, situanta en la kvartalo de Grenelle, por krei tie kurejon por bicikla kompetado. Inaŭgurita la 20-an de decembro 1903, la ciklodromo rapide akiris grandan popularan sukceson. Tamen, en 1909, la urbo anoncis la malkonstruon de la Galerio de Maŝinoj por liberigi la perspektivon al la Champ de Mars. Desgrange decidis ekkonstrui apude, ĉe la angulo de Bulvardo de Grenelle kaj de Strato Nélaton, novan templon de la biciklo. En la nova Vel' d'Hiv' kiu naskiĝis, 17000 spektantoj, sur sidŝtuparoj el brikoj kaj betono, povis observadi biciklistojn kiuj rondiris 250 metrojn longan kurejon el abio, ĉirkaŭ vasta centra razeno. La spektaklejo estis prilumata de grandega zenita vitrotegmento kaj pli ol mil elektraj lampoj.

Multnombraj manifestacioj animis tiun ekipaĵon. La fama bicikla kurado de la Six jours de Paris (6 tagoj de Parizo), kreita en 1913, laŭ la ekzemplo de simila usona kurado, ekkonis sian apogeon inter la du mond-militoj, kaj rapide fariĝis la kulmino de la bicikla sezono. En 1926 komenciĝis la elekto de la Reine des 6 jours (Reĝino de la 6 tagoj), ŝarĝita startigi la kuradon; Reĝinoj estis elektitaj en la medio de laŭmodaj popularaj artistinoj: Édith Piaf, Annie Cordy, Yvette Horner estis Reĝinoj de la 6 tagoj. Animado disvastiĝis tag-nokte en la stratoj de la kvartalo.

En 1931, la konstruaĵo estis renovigita de usonano Jeff Dickson kaj fariĝis la Palais des Sports de Grenelle (Sport-Palaco de Grenelle). Efektive, kun sia kompanio Jeff Dickson International Sports, li organizis, krom la tradiciaj boks-turniroj kaj biciklaj kuradoj, aliajn sportajn kompetadojn en ĝia interno: teniso, korbopilko kaj ankaŭ glacihokeo kaj glacisketado (dank' al adekvata aparataro ebliganta realizadon de sketejo). Tio estis la komenco de glacihokeo en Francio.

Post la milito, tie estis organizitaj boks-turniroj kun Marcel Cerdan aŭ Sugar Ray Robinson ekzemple, ĉeval-konkuroj, kaj eĉ modparadoj.

Ekde la 16-a de julio-17-a de julio 1942, tie restis kaptitaj dum pluraj tagoj sub severaj kondiĉoj miloj da Judoj, viktimoj de la Rastado de la Vintra Ciklodromo (13152) antaŭ ilia deportado al ekstermejo de Aŭŝvico-Birkenau.

La Ciklodromo estis malkonstruita en 1959.

Vidu ankaŭ

• Rastado de la Vintra Ciklodromo
• La Rafle (2010)
• Palais des Sports de Paris
• Palais Omnisports de Paris-Bercy

Eksteraj ligiloj

• archi.fr
• Fotoj de la Galerio de Maŝinoj de la Ekspozicio de 1889