Joan Oliver

Literaturo > Katalunlingva literaturo

---

Joan OLIVER i SALLARÈS (Sabadell, 1899 - Barcelono, 1986). Kataluna verkisto. Estante el burĝa familio, li studis juron, sed baldaŭ okupiĝis pri literaturo kaj kunlaboris en pluraj ĵurnaloj. En 1934 li aperigis sub la pseŭdonimo Pere Quart sian unuan poem-libron Senkapigoj (Decapitacions), kie inter humuro kaj satiro troveblas kelkaj temoj, kiuj poste definitive karakterizos lian verkaron. Ĝin sekvos Bestaro (Bestiari, 1937), epigrama poemaro kaj eta lingva ĉefverko. Li aperigis ankaŭ plurajn teatraĵon, kiel Tragedio en Liliputo ('Una tragèdia a Lil·liput, 1928) kaj La malsato (La fam, 1938). Dum la civitana milito (1936-39), lia verkaro transiris de kritiko al aperta aktivismo. Li ekziliĝis en 1939 kaj vivis en Santiago de Chile ĝis 1948, kie eldoniĝos lia elegia poemaro Aŭtuna salono (Saló de tardor, 1947). Reveninte en Katalunion, li sekvos la padon de la historia realismo. Indas mencii liajn poemarojn Vrakotero (Terra de naufragis, 1956), Pagitaj ferioj (Vacances pagades, 1960) kaj Kvar mil vortoj (Quatre mil mots, 1977). Inter liaj teatraĵoj, Ŝtelita danco (Ball robat, 1960). Li ankaŭ abunde tradukis, i.a. Colette, Elsa Morante, Simone de Beauvoir, Molière, George Bernard Shaw, Paul Claudel, Samuel Beckett kaj Anton Ĉeĥov. Li ricevis multnombrajn premiojn, i.a. tiun de la Prezidanto de la Franca Respubliko, kiel tradukisto, kaj la Honor-Premio de la Kataluna Beletro.

Eksteraj ligiloj

http://www.esperanto.cat/e/retalls/literaturo/oliver.htm