Marin Bacev

Bulgaraj geesperantistoj

Marin BACEV (1927-1996) mortis la 28-an de septembro en Sofio. Li pasigis sian movadan vivon en la servo de la E-instruado, i.a. kiel vic-sekretario (1985-88) kaj ĉiam aktiva membro de Internacia Ligo de E-istaj Instruistoj, respondeculo de Bulgara EAsocio pri instrumetodiko, ekzamenanto en UEA/ILEI-ekzamenoj kaj delegito pri instruado. Li kunverkis oficialan metodikan gvidilon bulgarlingvan (1983), kuntradukis libron pri la komponisto Dimitar Terziev, Per flugiloj de la kanto (1995), kaj redaktis la antologion Kubaj popolaj fabeloj (1996). Li instruadis diverslande: en 1990 dum ses monatoj li instru-preparis kubajn e-istojn antaŭ la Havana UK, kaj laste li gvidis kursojn en aprilo-junio 1996 en Litovio.