Bildotabuloj por la instruado de Esperanto

Thora Goldschmidt kreis bildotabulojn pri la ĉiutaga vivo por la instruado de fremdaj lingvoj, aperantajn en la eldonejo Ferdinand Hirt und Sohn en Leipzig, Germanio. En la jaro 1919 Johannes Dietterle, la tiama direktoro de la Saksa Esperanto-Instituto en Leipzig, prizorgis eldonon en Esperanto. La libro liveras materialon por interparoloj inter instruisto kaj lernanto aŭ inter du lernantoj. Krom 35 bildotabuloj de Goldschmidt ĝi enhavas tekstojn, ekzercojn, fundamentan gramatikon kaj aliajn helpilojn por la lernado de Esperanto. La bildoj ebligu lerni la novan lingvon nur per tiu lingvo, ne uzante la gepatran lingvon. La libro enhavas 104 paĝojn. La formato mezuras 19-oble 26 centimetrojn. Dua, korektita eldono sub la titolo Esperanto per instruaj bildoj aperis en 1921. La bildotabuloj aperis ankaŭ por la lingvoj franca, angla, itala kaj germana.