Jouko Lindstedt

Jouko Lindstedt

Jouko LINDSTEDT (naskiĝis en 1955) estas profesoro en Instituto pri Slavistiko kaj Baltologio de la Universitato de Helsinko (Finnlando).

Li disertis pri semantiko de la bulgara lingvo en 1985 kaj okupiĝas ankaŭ pri Esperanto. Jouko Lindstedt estas membro de Akademio de Esperanto kaj konata en Esperantio:

• pri sia taksopropono pri la nombro de esperantoparolantoj en la mondo (vidu sube).
• kiel esperanta edukanto kaj redaktoro de la Hejma vortaro.
• kiel kunverkinto de la Manifesto de Raŭmo.
• kiel la Esperantisto de la Jaro en 2000 (kun Hans Bakker kaj Mauro La Torre), nomumita de La Ondo de Esperanto.

Lia nuntempa esplorado inkluzivas temojn rilatajn al la lingvoj la bulgara, la makedona kaj Esperanto, kaj al lingvopolitiko.

La nombro de Esperanto-parolantoj

En retmesaĝo al la retlisto denask-l de la 22-a de aprilo 1996 Jouko Lindstedt taksis la nombron de la Esperanto-parolantoj jene (modifita versio; unua takso: 19-a de aprilo) :

• "1 000 havas Esperanton kiel denaskan lingvon.
• 10 000 parolas ĝin flue.
• 100 000 scias aktive uzi ĝin.
• 1 000 000 pasive komprenas multe.
• 10 000 000 iam iom studis ĝin."

Lindstedt klarigis, ke temas pri tre neprecizaj ciferoj; ili celas diri, ekzemple, ke "se oni taksas la nombron de la denaskaj esperantistoj nur en centoj, povas esti tro malmulte, sed ne troviĝas multaj miloj da ili".

La modifo okazis pro sugesto de Edmund Grimley Evans.

Eksteraj ligiloj

• Hejmpaĝo de Jouko Lindstedt en Esperanto.
• Intervjuo je laŭreatiĝo kiel Esperantisto de la Jaro.
• Verkoj de kaj pri Jouko Lindstedt en la Kolekto por Planlingvoj kaj Esperantomuzeo