Muzaiko

Muzaiko
Slogano	Mojoseco kaj Muziko: Muzaiko!
Formato	interreta radiostacio
Frekvencoj	Tra interreto per Streaming kaj Podkasto
Tempo de elsendo	Tuttaga
Zono de elsendo	Tutmonda
Lanĉita	1-a de julio 2011
Gvidantoj	Volontuloj
Retejo	Muzaiko.info
Reta elsendo	Aŭskulti per Radionomy
Facebook	Muzaiko
Twitter	@Muzaiko

Muzaiko estas tuttempa internacia interreta radiostacio en Esperanto.

Historio

En aprilo 2011 estiĝis dum la Brita Kongreso de Esperanto grupo de homoj kun la sama ideo: krei tuttempan radion en Esperanto. Ĉefa antaŭeniganto de la ideo estis hungara esperantistino Veronika Poór. La interreta dissendolisto de la teamo rapide kreskis, kaj post nelonge oni elektis nomon: Muzaiko. Por elsendi oni provizore elektis uzi la servojn de Radionomy, retejo subtenanta interretajn radiojn interŝanĝe por reklamo, kaj pere de ĝi nun ekde la 1-a de julio Muzaiko elsendas, kvankam iama transiro al propra elsenda aparataro estas planata.

La teamo

La projekton ekde la komenco volontule organizas neformala internacia grupo de junaj esperantistoj kunlaboranta per la interreto. La laboro estas realigata precipe per dissendolistoj (unu ĉefa kaj kelkaj specialaj), iam ankaŭ per virtualaj kunvenoj per Skajpo kaj foje per fizikaj renkontiĝoj dum esperanto-renkontiĝoj (la teamo de Muzaiko prezentiĝis dum JES 2011/2012). La teamo aktive varbas por allogi novajn kunlaborantojn.

Programo

Ekde la 3-a de oktobro 2011 ripetiĝas ĉiutage malsama 3-hora programo, el kiu unu horon konsistigas nova sonmaterialo. La radio elsendas muzikon, mondajn novaĵojn (je ĉiu plena horo), babilajn programerojn kaj reklamojn el Esperantujo; aperas ankaŭ eroj de aliaj jam ekzistantaj podkastoj.

Eksteraj ligiloj

• Muzaiko.Info
• [video] "Kio estas Muzaiko?" – parto de la Virtuala Kongreso 2020
• Programo por aŭskulti Muzaikon per Android
• Programo por aŭskulti Muzaikon per OUYA
• Alternativa aŭskultado de Muzaiko.info-retradio