Theodor Steche

El Vikipedio, la libera enciklopedio
Saltu al: navigado, serĉo

Theodor STECHE, naskita 1895-12-04 en Lepsiko, filo de la multjara prezidanto de Germana Esperanto-Asocio Albert Steche, germano, d-ro de fil. Steche estis per sia unua profesia kleriĝo ĥemiisto, sed poste studis lingvistikon. Pli ol en la Esperanto-movado, Steche junaĝa aktivis en la lingvonaciisma Germana lingvo-Asocio (Deutscher Sprachverein) kaj iĝis membro de ĝia konsilanto-komitato (Beirat). En 1925 eldoniĝis libro de li pri "lingvokulturado": Neue Wege zum reinen Deutsch (Novaj vojoj al pura germana lingvo). Ĝin aprezis ankaŭ esperantistoj pro la en ĝi starigita hipotezo pri la utilo de planlingvistiko kaj Esperanto-studoj kiel helpaj sciencoj ĉe klopodoj por purigi la germanan lingvon je eksogenaj leksikaj elementoj ("fremdvortoj"). Steche faris en 1931 festparoladon pri Sprachwissenschaft und Welthilfssprache (Lingvistiko kaj monda helplingvo) ĉe la Germana Esperanto-Kongreso en Hamburgo.

Jam en 1932 Steche aliĝis al la nazia Batalligo por Germana Kulturo (Kampfbund für deutsche Kultur) estrita de Alfred Rosenberg. En tiu asocio li iĝis referanto (fakestro) pri la germana lingvo. Baldaŭ poste li aliĝis al la nazia partio NSDAP mem. Post la ekrego de la nazioj en Germanio, Steche antaŭenigis la faŝisman samdirektigon (ideologian konformigon) de la Germana lingvo-Asocio. Dum sia posta kariero li okupiĝis interalie pri ĝermana prahistorio kaj ortografia reformo de la germana lingvo.

Laŭ informo de Léo Courtinat (Historio de Esperanto), Steche mortigis sin kaj sian tutan familion en Rostock je la alveno de la soveta armeo en 1945.