Tolaro
| Tolaro (Tolar) 25-a de junio 1991 ĝis 31-a de decembro 2006 | |
|---|---|
| Lando: | Slovenio |
| subdivido: | 1 tolaro = 100 stotinoj |
| mallongigo: | SIT |
| kurzo (fiksa): | 1 Eŭro = 239,640 SIT |
La tolaro (slovene tolar) – vorto parenca al la germana vorto Taler kaj la angla vorto dollar, do dolaro – estis la nacia valuto de la ŝtato Slovenio ekde la sendependiĝo de la ŝtato dum la jaro 1991[1] ĝis la enkonduko de la eŭropa valuto Eŭro kiel nacia valuto de Slovenio la 1-an de januaro 2007. Unu tolaro korespondis al 100 stotin-oj. La valuto-kodo laŭ ISO 4217 estas SIT.
Ekzistis monbiletoj en valoro de 10, 20, 50, 100, 200, 500, 1000, 5000 kaj 10.000 tolaroj. Sur ili bildiĝis konataj personoj el la politika, historia kaj socia vivo de Slovenio - ekzemple Primož Trubar, Jurij Vega, Jože Plečnik, Rihard Jakopič, Iacobus Gallus, Ivan Cankar, Johann Weichard Freiherr von Valvasor, France Prešeren kaj Ivana Kobilca. Moneroj ekzistis en valoro de 10, 20, 50 stotinoj kaj de 1, 2, 5, 10, 20 kaj 50 tolaroj. Sur unu el iliaj du flankoj aparte bildiĝis bestoj tipaj en Slovenio.
Dum la 1-a de majo 2004 Slovenio aliĝis al la Eŭropa Unio (EU). Dum la 27-a de junio de la sama jaro la ŝtato kune kun Estonio (estona krono) kaj Litovio (litova lido) aliĝis al la interkonsento pri Eŭropa Valutoŝanĝa Mekanismo II.
La 8-an de marto 2006 Slovenio kiel unua de la dum la 1-a de majo 2004 aliĝintaj ŝtatoj de EU oficiale petis enkonduki la eŭropan valuton Eŭro kiel nacia valuto. La 16-an de majo 2006 la Eŭropa Komisiono rekomendis subteni tiun peton kaj akcepti Slovenion en la "Eŭrozono". Ankaŭ la pintokunveno de politikistoj el la EU-ŝtatoj de la sama tago subtenis la peton. La formale finan decidon pri la akcepto de la peto alprenis la ekonomia konsilio de EU la 11-an de julio 2006. La komuna valuto Eŭro do ekde la 1-a de januaro 2007 estas la oficiala valuto de Slovenio, kun fiksa ŝanĝokurzo de 239,640 tolaroj por unu Eŭro.
Vidu ankaŭ
- la paĝon pri la sloveniaj eŭro-moneroj validaj ekde 2007.
Referencoj
Eksteraj ligiloj
greke paĝoj de Banka Slovenije, la Nacia Banko de Slovenio (slovene kaj angle) greke paĝoj de la Eŭropa Centra Banko en Frankfurto-ĉe-Majno (precipe angle, sed parte en ĉiuj lingvoj de EU) greke katalogo kaj bildaro pri monbiletoj de la slovena tolaro (ruse)
| ||||||
