Valentin Melnikov
| Valentin Melnikov | |
|---|---|
 Valentin Melnikov |
|
| Personaj informoj | |
| Naskiĝo | 18-an de julio 1957 en  Sovetunio |
| Nacieco | ruso |
| Lingvokapablo | Esperanto |
| Esperanto | |
| Tradukis en Esperanton | satirajn poemciklojn, novelojn, versromanon "Eŭgeno Onegin" |
| Esperantistiĝis en | 1982 |
Valentin MELNIKOV (ruse Валентин Викторович Мельников) naskiĝis 18-an de julio 1957, konstante loĝas en Moskvo. Inĝeniero-kemiisto laŭ diplomo, ekde 1980-aj jaroj ĝis 2015 laboris kiel komputisto. Esperantisto ekde 1982. Diplomita instruisto de Esperanto, membro de la Ĉefa Atesta kaj Lingva Komisiono de la Rusia Esperantista Unio. Poeto, tradukisto el la rusa kaj aliaj lingvoj, ĵurnalisto, recenzisto. Kunaŭtoro de la libroj "La birdo Gamajun" (1989), "Moskvaro" (1998), "Lena..." (1998), "Mondoj" (2001), "Moskvaj sonoriloj" (2007), "El ombro" (2008). Atentindas liaj akre satiraj poemcikloj "Socia moralo" kaj "Observoj de biletkontrolisto", ankaŭ lirika "Sonetoj al mia Muzo". Furoris lia traduko de maldeca poemo Kojonov Luĉjo (1995).
V.Melnikov tradukis kelkajn novelojn de Anton Ĉeĥov kaj Lev Tolstoj. Faris la plej plenan kaj precizan tradukon de la versromano "Eŭgeno Onegin" de Aleksandr Puŝkin (eldonita de 'Sezonoj', 2005). En 2007-2015 li tradukis elektitajn verkojn de rusaj poetoj de 18-19a jc., la materialoj por estonta Rusa Antologio regule aperis en "La Ondo de Esperanto". En 2016 ricevis honoran mencion en Belartaj konkursoj de UEA.
V.Melnikov verkis grandan artikolon pri Esperanto en multvoluma ruslingva "Porinfana enciklopedio" (1998) - kelkaj fakuloj nomis ĝin la plej bona ruslingva enciklopedia artikolo pri Esperanto. Redakciano de "La Ondo de Esperanto" ekde ties (re)apero en 1991 kaj de Ruslanda Esperantisto, Moskva Gazeto, Survoje. Redaktoro de "Cerbe kaj Kore" (1998-2000). Kontribuis al BA1, BA7, BA8, BA12, BA17, BA19, BA24. Konstante kunlaboras en La Karavelo. Liaj verkoj (ĉefe poemoj kaj recenzoj) aperis ankaŭ en Esperanto (UEA), Hungara Vivo, Literatura Foiro, Litova Stelo, Monato, Sezonoj, Esperantista Tribuno k.a.
La moskva kongreso de REU (1997) komisiis al li gvidi la Literaturan sekcion de REU. Estrarano de REU en 2015-2017.
Konata en la medio de intelektaj ludoj. En 1994-2000, 2009 kaj 2011 sukcese partoprenis en televida "Propra ludo". En 2006 iĝis ĉampiono de Rusio en la ludo "Kio? Kie? Kiam?" kun la teamo "Nesprosta".
Naturisto. Fakdelegito de UEA. Kunlaboras en la projekto "Ekparolu!" de la retejo edukado.net
Eksteraj ligiloj[redakti | redakti fonton]
- La paĝo pri Valentin Melnikov en "Originala Literaturo Esperanta"
- Reta Taglibro de Valentin Melnikov
- Verkoj de kaj pri Valentin Melnikov en la Kolekto por Planlingvoj kaj Esperantomuzeo
Rete legeblaj verkoj[redakti | redakti fonton]
- Verkoj
- Socia moralo
- Observoj de biletkontrolisto
- Sonetoj al mia Muzo
- Artikolo pri Esperanto en multvoluma ruslingva "Porinfana enciklopedio"
