William Congreve (dramisto)
William CONGREVE (n. la 24-an de januaro 1670, m. la 19-an de januaro 1729) estis angla verkisto kiu famas ĉefe pro siaj teatraĵoj.
Familio kaj frua vivo
Li naskiĝis en Bardsey, malgranda vilaĝo proksime al Leeds, Okcidenta Jorkŝiro, kaj estis filo de William Congreve kaj ties edzino Mary Browning. Li havis fratinon kiu entombiĝis en Londono en 1672.
Li infanis en Irlando, kien lia patro translokiĝis dum la regado de Karlo la 2-a. Li studis ĉe Trinity College (Dublino), kie li amikiĝis al Jonathan Swift. Poste li iris al Londono por studi juron, sed altiriĝis al literatura kariero. Li ege admiris la verkojn de John Dryden.
Posta vivo
Congreve havis plurajn malgravajn ŝtatpostenojn.
Li neniam edziĝis, sed ĝuis amrilatojn kun famaj nobelinoj kaj aktorinoj, inter kiuj estis Anne Bracegirdle kiu ĉefrolis en ĉiuj liaj teatraĵoj, kaj Henrietta Godolphin (dukino de Marlborough), kiu estis filino de la generalo John Churchill (1-a duko de Marlborough), kaj de kies filino Mary (1723-1764) li onidire estis la patro.
Antaŭ 1710 li komencis suferi pro kataraktoj kaj podagro. Septembron 1728 li vundiĝis dum kaleŝakcidento kaj neniam resaniĝis. Li mortis en Londono en januaro 1729 kaj entombiĝis apud aliaj gravaj verkistoj en Abatejo Westminster.
Verkoj
De 1693 al 1700 li verkis kvin tre popularajn teatraĵojn:
- The Old Bachelor (La Maljuna Fraŭlo), komedio, 1693
- The Double Dealer (La Perfidulo), komedio, 1693
- Love for Love (Amo interŝanĝe por Amo), komedio, 1695
- The Mourning Bride (La Funebranta Novedzino), tragedio, 1697
- The Way of the World (La Moroj de la Mondo), komedio, 1700
La komedioj eĉ nun ensceniĝas, aparte Love for Love kaj The Way of the World.
Post 1700 li verkis nur unu-du poemojn kaj plurajn tradukojn, inkluzive Monsieur de Pourceaugnac de Molière.