Rietveld-Schröder-Domo
La Rietveld-Schröder-Domo estas domo formplanita fare de Gerrit Rietveld kaj situas en Utrecht. Ĝi estas tute konstruita (1923–1924) laŭ la ideoj de la artmovado De Stijl (La Stilo). Rietveld formplanis la domon por Truus Schröder-Schräder, kiu loĝis en ĝi ekde 1924 ĝis sia morto en 1985. La domo situas je la adreso Prins Hendriklaan 50 en la kvartalo Wilhelminapark kaj estas vizitebla pere de gvidadoj. Ĝi estas ekde 2000 sur la listo de la Monda Heredaĵo de UNESKO.