Charles Verax

Foto de 1906

Charles VERAX [veraks], (pseŭdonimo Karlo Verks) (naskiĝis la 28-an de februaro 1873 en Parizo - mortis en 1943) estis franca fotografisto, esperantisto kaj la plej grava Esperanta terminologo de la epoko antaŭ la unua mondmilito.

Verax esperantistiĝis en 1902. Per longa kunlaborado en Internacia Scienca Revuo li akiris kompetentecon pri teknika terminaro, kaj fariĝis specialisto en tiu afero. Li fondis kaj redaktis Foto-revuon (1906-1909) kaj Sciencan Gazeton (1912-1914). Ekde 1909 Verax estis membro de la Lingva Komitato, ekde 1911 direktoro de la Komisiono por teknika lingvo.

Verkoj (selekto)

• Elementa Fotografa Optiko, 1906
• Vocabulaire français-Espéranto des termes technologique des termes les plus employés en photographie et dans ses rapports avec la chimie, la physique et la mécanique , 1907
• Vocabulaire technique et technologique français-Espéranto, 1908
• Enciklopedia Vortareto Esperanta kun franca traduko kaj difinoj en Esperanto, 1910.
• Propono pri Terminologiaj Fundamentaj Principoj por la Scienca Lingvo en Esperanto. En: Scienca Gazeto - Terminologia Fako 1a jaro 1912, n-ro 2-3, p. (9)

La Enciklopedio de Esperanto en 1934 juĝas: "Tiuj du „vortaretoj“ [laste menciitaj] fakte estas gravaj kaj fundamentaj verkoj por studo de teknikaj vortoj".

Eksteraj ligiloj

• Libroj de kaj pri Charles Verax en la Kolekto por Planlingvoj kaj Esperantomuzeo
• Artikoloj de kaj pri Charles Verax en Elektronika Bibliografio de Esperantaj Artikoloj (EBEA)