Jerzy Fornal

Esperanta Kulturo > Esperanta Teatro > Jerzy Fornal

---

Jerzy Fornal, aktoro laŭ profesio, en la esperantista mondo dank'al sia persisto, talento kaj apogo de la edzino fariĝis tuta institucio, nome unuaktora teatro prezentinta sin en plimultaj eŭropaj kaj multaj ekstereŭropaj landoj. Malgraŭ sia aĝo li ĉiujare sukcese prezentas dum Arkones novan spektaklon kaj imponas per energia ĉeesto en aliaj programeroj. Jerzy Fornal gvidis la kurson pri aktora/sceneja movo kaj prezentis „Grabowski en Esperanto-poezio" en XVII-aj Arkones kaj "Aniaro" en XVIII-aj. Li ankaŭ aperis en festivalo KAFE en Tuluzo en la jaro 2000 kie li prezentis "Aniaro".

En Varsovio oni ofte povas ĝui liajn Esperanto-spektaklojn en "Muzeo Pri La Azio Kaj Pacifiko".

Jerzy Fornal laboras kiel aktoro de la Nacia Teatro en Varsovio, kaj debutis en la E-teatro en 1982. De tiam li prezentiĝis en naŭ tre variaj monodramoj per kiuj li respegulas la sorton de la individuo en la socio

• "Prikanti la homan sopiron", lirik-poeziaĵo bazita en la poezio de la pola poeto Zdzislaw Laczkowski, tradukita de Kris Long
• Virino kvar bildoj, ampoezio de Eduardas Mieżelaitis kaj diversaj poetoj tradukita de William Auld;
• Aniaro, poezia-muzika spektaklo, tradukita, ankaŭ de William Auld, el sveda epopeo verkita de Harry Martinson.
• Sopiro-laboro-espero, bazita je la poezio de L.L. Zamenhof
• Einstein - konfeso el Ŝeolo, de Gunnar Gällmo
• Wolfgangerl, de Gunnar Gällmo, dramo pri la vivo de Mozart
• Tajdo de la vivo, bazita je la monologo Brando de Emilija Lapenna
• Eduko danĝera kaj Vagabondo, ambaŭ de la angla verkisto Harold Brown.
• La Granda Koncerto, laŭ scenario de Jerzy Fornal
• Apologio de Sokrato, Platono
• Polaj poetoj en Esperanto, en traduko de Antoni Grabowski, recitalo de Jerzy Fornal
• Rimleteroj, de Marjorie Boulton kaj William Auld
• La jubileo, de Zofia Banet Fornalowa kaj Harold Brown
• El la "Verda Biblio", laŭ Izrael Lejzerowicz
• La Arlekeno, de Janusz Korczak

ĈIUMONATA RENDEVUO KUN TEATRO ESPERO EN VARSOVIO De septembro 1998 ĝis junio 1999 (kaj ankaŭ en la jaroj 2001-2002) ĉiumonate je la unua lundo okazis prezento de la Teatro Espero en Varsovio, kies motoro estas la konata artisto Jerzy Fornal. La repertuaro proponas monologojn, plej ofte originale verkitaj en esperanto. La 7an de junio Jerzy Fornal prezentis specialan omaĝon al la 75a naskiĝjaro de William Auld kaj Marjorie Boulton, per la enscenigo de ilia kunverko "Rimleteroj". La spektakloj okazas ĉiam en la artgalerio Nusantara, str. Nowogrodzka 18, ekde la 17h00. Unu horon pli frue Zofia Banet Fornalowa gvidas konversacian rondon pri la E-kulturo.

Eksteraj ligoj

• ESPERANTO - TEATRO "ESPERO" DE JERZY FORNAL
• JERZY FORNAL (ŝajne ne plu funkcias)
• Aniaro.
• ARKONES