Tucher von Simmelsdorf
La familio Tucher von Simmelsdorf [TUĥa fon ZIMelsdorf] estas influa patricia dinastio de la mezepoka libera imperia urbo Nurenbergo, unuafoje dokumente menciata en la jaro 1309. La familio origine havis la nomon Tucher, kaj nur ekde 1598 ampleksigis ĝin je la nobela aldonaĵo "von..." ("de..."), ĉar tiujare ĝi aĉetis la nobelan kastelon kaj kavaliran bienejon Simmelsdorf kaj de tiam rajtis je la prestiĝa nobela nom-aldonaĵo. Reprezentanto de la familio kun nur mallongaj interrompoj de la jaro 1340 ĝis la fino de la statuso de libera imperia urbo en 1806 membris en la "interna konsilio" de la urbo Nurenbergo kaj laŭ urba statuto estis inter la "dudek malnovaj konsiliaj familioj". Pro la posedo de Simmelsdorf la familio membris en la loka kantono de la imperia kavaliraro en Frankonio.
Pro pentraĵo de Albrecht Dürer el 1499 konatiĝis la familianino Elsbeth Tucher, naskiĝinta Pusch (naskiĝjaro nekonata, mortis en 1517). Samjare la artisto ankaŭ pentris la familianojn Hans, Nikolaus kaj Felicitas Tucher, sed la bildo de Elsbeth aparte atentiĝis, kiam en 1961 ĝi fariĝis portreta bildo de la monbileto de 20 germanaj markoj.
