Altostratuso
Altostratuso (latine altostrātus, mallongigo: As) estas genro de nuboj tavolformaj, kiuj troviĝas inter 2 kaj 7 kilometroj super marnivelo.
Klasifiko[redakti | redakti fonton]
La Internacia Nubatlaso enhavas neniun speciojn de la genro altostratuso. Laŭ la Internacia Nubatlaso, la genro altostratuso enhavas kvin variojn.
- La diafana altostratuso (latine altostrātus trānslūcidus, mallongigo: As tr) estas sufiĉe maldika ke oni povas travidi la Sunon aŭ la Lunon.
- La opaka altostratuso (latine altostrātus opācus, mallongigo: As op) aspektas opake kaj netravideble.
- La duobla altostratuso (latine altostrātus duplicātus, mallongigo: As du) konsistas el pluraj tavoloj, kelkfoje parte kunigitaj. Tiu vario estas malofta.
- La ondoforma altostratuso (latine altostrātus undulātus, mallongigo: As un) aspektas kiel ondoforma tavolo.
- La radiata altostratuso (latine altostrātus radiātus, mallongigo: As ra) konsistas el paralelaj rektoj. Pro perspektivo, tiuj rektoj ŝajnas radiataj el unu punkto en la horizonto. Tiu vario estas malofta.
La Internacia Nubatlaso listas la jenajn suplementajn trajtojn:
- Verga altostratuso (latine altostrātus virga, mallonge As vir) havas precipitaĵon, kiu tamen ne atingas la tersurfacon kaj tial aspektas simile al vergoj; tia precipitaĵo nomiĝas fantompluvo.
- Precipitanta altostratuso (latine altostrātus praecipitātiō, mallonge As pra) havas precipitaĵon, kiu atingas la tersurfacon.
- Mama altostratuso (latine altostrātus mamma, mallonge As mam) havas rondajn elstaraĵon sube, simile al bovinaj mamoj.
-
Diafana altostratuso super Honkongo. La suno estas videbla tra la nubo. -
Diafana altostratuso. La suno estas videbla tra la nubo. -
Opaka ondofroma altostratuso -
Opaka mama altostratuso
Historio[redakti | redakti fonton]
La nomo "altostratuso" estas kunmetitaĵo de alto kaj stratuso. Tiu genro estis proponita de la franca meteologo Émilien Jean Renou (1815–1902) en 1855.[1]
Referencoj[redakti | redakti fonton]
- ↑ Renou, Émilien Jean (1855). “Instructions météorologiques”, Annuaire de la Société Météorologique de France (fr) 3, p. 142–146.
Eksteraj ligiloj[redakti | redakti fonton]
- Altostratus (As) (Renou 1855) (angle). International Cloud Atlas.
Genroj de nuboj laŭ la Internacia Nubatlaso
Ciruso | Ciruskumuluso | Cirusstratuso | Altokumuluso | Altostratuso | Kumuluso | Stratokumuluso | Stratuso | Kumulonimbuso | Nimbostratuso