Domo de Ottendorfer

El Vikipedio, la libera enciklopedio
Saltu al: navigado, serĉo
La domo de Ottendorfer

La Domo de Ottendorfer - ĉeĥe Ottendorferův dům - estas ruĝbrika historiisma konstruaĵo kun turo en la ĉeĥia urbo Svitavy (germane Zwittau), apartenanta al la tipaj simboloj de la urbo. La domo konstruiĝis en 1892 de la usona ĵurnalisto, filantropo kaj loka naskiĝinto Valentin Oswald Ottendorfer surloke de lia naskiĝdometo. Origine sidejo de la publika Biblioteko de Ottendorfer, ĝis la Dua Mondmilito la plej ampleksa kaj plej moderna germanlingva biblioteko en Moravio (reston de la kolekto nuntempe prizorgas Urba muzeo kaj galerio), la konstruaĵo en la epoko de socialisma Ĉeĥoslovakio iĝis urba kulturdomo. Ekde 2008 en la teretaĝo trovigas Esperanto-Muzeo kaj teejo, la supra kultursalonego daŭre servas kiel koncertejo.

De merkredo la 26-a ĝis dimanĉo la 30-a de oktobro 2011 en la domo okazis la unua "Esperanta Vikimanio" - internacia renkontiĝo de uzantoj de la Vikipedio en Esperanto, okazigita omaĝe al la dekjariĝo de la Vikipedio en Esperanto, fondita en novembro 2001.