Diskuto:Ĉado

PIV nomas la landon Ĉadio. Oni pripensu uzi tiun nomon en Vikipedio. Aliflanke, Monato kaj UEA nomas ĝin Ĉado, do la elekto ne estas evidenta. Lingvano 20:17, 21. Apr 2005 (UTC)

Vi pravas, kaj la du variaĵoj ne estas nova evoluo: jam en la 1-a eldono de PIV de 1970 estis la noto "Ĉado: granda lago, oriente de Saharo" kaj "Ĉadio resp. Ĉadolando: afrika respubliko". En la jarlibro de UEA ĝis almenaŭ la jaro 1994 tute ne menciiĝis la lando, ĉar tie ĝis tiu jaro ankoraŭ ne ekzistis movade aktivaj esperantistoj. Nuntempe UEA uzas la formon Ĉado. Interese ke mi dum 40 jaroj nur vidis kaj aŭdis la formon Ĉado, kiun uzas Monato kaj ankaŭ transprenis vikipedio. Klara kialo por tiu prefero de la lingvokomunumo laŭ mi estas la logiko, ke kutime la pseŭdosufikso "-io" en landonomoj uzatas interŝanĝe kun unu el la signifoj de la pli malnova sufikso "-ujo", kaj indikas ke se oni subtrahas la literojn -i- aŭ -uj- el la lando oni venus al nomo de la ĉefa etno de la lando. Tio kompreneble ne funkcius ĉe la teoria formo "Ĉadio", kiu devus esti unu vortoradiko (kvankam la malnova vortumo "Ĉadio resp. Ĉadolando" de PIV-1970 supozigas ion alian): neniu nomus la civitanojn de la lando "ĉadoj", "ĉadinoj", "geĉadoj", "ĉadidoj" ktp. Supozeble pro tio la formo "Ĉadio" ĝis nun ankoraŭ ne konvinkis plej multajn esperantistojn, kvankam ĝi jam delonge proponatas en la vortaroj. ThomasPusch (diskuto) 06:18, 14 nov. 2022 (UTC)

Mi scias ke estas iuj precedencaj similaj kazoj, en kiu lando havas vortoradikon kiu nur hazarde finiĝas je -i-, komparu Alĝerion aŭ Haition. Sed en tiuj kazoj la landonomoj en plej multaj naciaj lingvoj ankaŭ finiĝas per -i- (ekz. Algérie aŭ Haïti), kaj en pli malpli ĉiuj naciaj lingvoj la landonomo por Ĉado ne havas ian finan vokalon -i-. Tio kaj la klarigo ke la lando laŭ PIV nomiĝus "Ĉadio resp. Ĉadolando" (en la nova reta eldono de 2020 eĉ klare markita "Ĉad io, Ĉad lando" kun verda vortoradiko) estas grava indiko ke "Ĉadi-" ne estas internacie konata vortoradiko... ThomasPusch (diskuto) 07:08, 14 nov. 2022 (UTC)

Alia temo:

Iu aldonis en la teksto la alineon "La administra partigo de Ĉadio radikale ŝanĝiĝis ekde 2018. Ĉadio nun estas dividita en 17 provincojn, 107 departementojn kaj 377 komunumojn. La regionoj estis alinomitaj provincoj." Tiu aserto estas iom problema, ĉar ĉiuj aliaj vikipedioj kaj ankaŭ ĉiuj eksteraj fontoj kiujn mi ĝis nun trovis, indikas ion alian: laŭ tiuj informiloj, la lando amplekse restrukturiĝis en 2008, tiam havis 22 regionojn, en 2012 la tri nordaj regionoj aligrupiĝis al kvar novaj, do ekde tiam estas 23 regionoj, kaj vere en 2018 tiuj 23 regionoj eknomiĝis provincoj. Pri onidiraj 17 provincoj mi ankoraŭ nenie trovis referencon, kaj ankaŭ mapoj kiel ekzemple la rapide adaptebla reta maposervo "guglo mapoj" daŭre uzas la landodividon al 23 provincoj de 2012. Se ni asertus ion tute alian ol ĉiuj aliaj branĉoj de vikipedio, ni almenaŭ devus havi konvnkajn eksterajn referencojn, kaj tiam devus ankoraŭ trovi volontulojn kiuj redesegnus ĉiujn mapojn de la lando en la vikimedia komunejo. Nun, sen tiaj referencoj, ankoraŭ estas tro aŭdace simple proponi iun tute alian realon ol pli-malpli ĉiuj aliaj. La departementojn kaj komunumojn mi nun ne individue nombris, kaj tial ne scias ĉu la asertitaj nombroj ĝustas. Ankaŭ por tiu nombroj en la nun duba situacio prefere ni postulu eksterajn referencojn. ThomasPusch (diskuto) 06:32, 14 nov. 2022 (UTC)

Mi tial provizore revortumas la supran aserton: "La administra partigo de la lando radikale ŝanĝiĝis en 2008, kaj plu adaptiĝis en 2012. La lando nun estas dividita en 23 provincojn, kaj plu dividatas al departementoj kaj komunumoj. La regionoj estis alinomitaj provincoj en 2018." ThomasPusch (diskuto) 06:36, 14 nov. 2022 (UTC)