Justin Godart
Justin GODART [godar'] (naskita la 26-an de novembro 1871 en Liono; mortinta la 13-an de decembro 1956 en Parizo) estis franca advokato kaj politikisto. Li estis urbestro de Liono. Li membris en la Nacia Asembleo kaj en la Senato de Francio.
Li estis malnova amiko de Esperanto kaj honora membro de UEA. Dum la unua mondmilito, estante gvidanto de la armea sanitara servo, li organizis en 1916 disdonon de lernolibro "Esperanto kaj Ruĝa Kruco" inter kuracistoj kaj flegistoj. Li klopodis por Esperanto ĉe la Internacia Laboroficejo kaj en 1922 protestis ĉe Léon Bérard pro la kontraŭ-Esperanta cirkulero.
