Menuo (komputilo)

El Vikipedio, la libera enciklopedio
Saltu al: navigado, serĉo
Disambig.svg La titolo havas ankaŭ aliajn signifojn, por vidi ilin bonvolu rigardi la apartigan paĝon: Menuo

Menuo estas ordona elemento en uzul-interfacoj, ekzemple de komputilo. Ĝi konsistas el listo de elekteblaj sub-elementoj. Oni elektas ilin per musklako, ekrantuŝo, tajpado de numero aŭ litero, elparolado de numero (ĉe telefono) aŭ io simila.

Komanda menuo de Ubuntu 9.04

Kontraste al elektaj elementoj, ekzemple listoj, la elekto de menuero kutime tuj ekigas certan operacion. Escepto estas menueroj, kiuj baskuligas inter du valoroj de certa agordo.

Menuo povas esti hierarkia; tio signifas, ke la elementoj de menuo povas esti aliaj menuoj. En grafikaj uzul-interfacoj tiaj sub-menuoj ofte disfaldiĝas apud la super-menuo; alikaze ili ofte anstataŭas ĝin.

Komputilaj programoj ofte proponas al uzulo kuntekstajn menuojn; tio signifas, ke la operacioj de menuo rilatas speciale al elektita objekto. En grafikaj uzul-interfacoj tiajn menuojn ofte aktivigas certa klavo de muso, puŝata sur la koncerna objekto. Ne-kunteksta menuo ofte troviĝas ĉe la supra rando de fenestro aŭ ekrano.

Telefonaj menuoj[redakti | redakti fonton]

Ĉar telefona uzul-interfaco estas aŭda, aŭtomataj respondiloj de telefonaj servoj ofte voĉe listigas la eblajn komandojn, ligante ilin al numero (ekz: "Se vi deziras scii la staton de via konto, elektu 4"). La kliento povas tiam diri la numeron aŭ, se li havas klavan telefonon, puŝi la respondan klavon. Ankaŭ tie eblas hierarkiaj sub-menuoj; kutime estas eblo por reiri al la super ŝtupo.

Etimologio[redakti | redakti fonton]

Tiu ĉi signifo de la vorto menuo aldoniĝis el la angla lingvo, kie la vorto menu signifas ne nur "menuo", sed ankaŭ "menukarto". Ĉar en interfaca menuo oni elektas simile kiel en menukarto, la angla vorto povis akiri la aldonan signifon. Aliaj lingvoj, ankaŭ Esperanto, transprenis ĝin, kvankam en ili "menuo" ne signifas "menukarto"; la esperanta radiko "menu-" do fariĝis homonima.

Vidu ankaŭ[redakti | redakti fonton]