Zofia Nałkowska
Zofia NAŁKOWSKA (naskiĝis la 10-an de novembro 1884 en Varsovio; mortis la 17-an de decembro 1954 en Varsovio) estis pola verkisto, publicisto kaj parlamentano.
Post la fino de la dua mondmilito ŝi, kiel membro de la internacia esplorkomisiono pri la krimoj de la germana armeo en Pollando (Główna Komisja Badania Zbrodni Niemieckich w Polsce) vizitis naziajn koncentrejojn. La literatura rezulto de tiuj travivaĵoj pri la holokaŭsto estas ŝia verko Medalionoj (pole Medaliony). En la libro ŝi detale priskribas la terurajn suferojn de poloj sub la nazia rego. Ĝi komenciĝas per la sekva, ofte citita frazo: Homoj al homoj preparis ĉi tiun sorton (pole Taki los zgotowali ludzie ludziom). Tiu ĉi malampleksa prozaĵaro, publikigita tuj post la milito, fariĝis grava literatura teksto kaj daŭre estas multe legata en la polaj lernejoj.
Nałkowska estis membro de la Pola Literatura Akademio kaj PEN-klubo, ŝi estis membro de la Ĉefa Estraro de la Asocio de la Polaj Literaturistoj.
Laŭ decido de Internacia Astronomia Unio unu el la kratejoj sur Venuso estis nomita Nalkowska.
En Esperanto aperis
- Medalionoj (Medaliony) Tradukis el la pola lingvo Tadeusz Hodakowski. 108 paĝoj.
- La 1-a eld. Varsovio: Eldonejo Polonia, 1957.
- La 2-a eld., represo. Varsovio: Pola Esperanto-Asocio, 1979.