Departemento de la Unuiĝintaj Nacioj pri Ekonomiaj kaj Sociaj Aferoj
La Departemento de la Unuiĝintaj Nacioj pri Ekonomiaj kaj Sociaj Aferoj - angle United Nations Department of Economic and Social Affairs (UNDESA), ruse Департамент по экономическим и социальным вопросам ООН - estas parto de la Sekretariejo de la Unuiĝintaj Nacioj. Ĝi respondecas pri la plenumo de decidoj kaj rekomendoj interkonsentitaj en la plej grandaj pintkunvenoj kaj konferencoj de la Unuiĝintaj Nacioj, plenumas servojn por la Ekonomia kaj Socia Konsilio de la Unuiĝintaj Nacioj kaj la dua kaj tria komitatoj de la Ĝenerala Asembleo de Unuiĝintaj Nacioj.[1]
En iuj areoj la departemento laboras per nerektaj vojoj por subteni tutmondan evoluon kaj stabilecon.[2]
En 2002, pro la kreskiĝanta pezo servi al plimultiĝanta nombro de konferencoj inkluzive ekzemple de la "Jarmila Deklaro de la Unuiĝintaj Nacioj", la departemento estis plilarĝigita kaj ricevis novan oficon de asista ĝenerala sekretario.[3] La departemento havas sian centran oficejon en Novjorko, sed ankaŭ havas gravan duavican oficejon en Romo, Italio. Ekde la 1-a de julio 2007, Ŝa Zukang estas la gvidanto de la departemento.[1]
Pro la graveco, kiun la Unuiĝintaj Nacioj atribuas al ekonomiaj kaj sociaj aferoj, la departemento havas plurajn gravajn diviziojn. Inter ili estas la Divizio pri Evolua Politiko, la Oficejo pri Financoj por Evoluo, la Divizio por Daŭra Evoluo, la Divizio pri Socia Evoluo, la Divizio pri Publika Administrado, la Statistika Divizio de la Unuiĝintaj Nacioj, kaj la Divizio pri Loĝantaro.
Notoj
- ↑ 1,0 1,1 Pri s-oro Ŝa Zukang, asista ĝenerala sekretario de la Unuiĝintaj Nacioj, 2007-09-21
- ↑ dokumento A-53-488 el la 53-a sesio de la Ĝenerala Asembleo de la Unuiĝintaj Nacioj, la 12-an de oktobro 1998
- ↑ dokumento A-57-387 el la 57-a sesio de la Ĝenerala Asembleo de la Unuiĝintaj Nacioj, la 2-an de oktobro 2002
Eksteraj ligiloj
- retejo de la Departemento de la Unuiĝintaj Nacioj pri Ekonomiaj kaj Sociaj Aferoj (angle, arabe, ĉine, france, hispane kaj ruse)
- retejo de la Unuiĝintaj Nacioj pri ekonomia kaj socia evoluo (angle, arabe, ĉine, france, hispane kaj ruse)
- bazaj informoj de la Unuiĝintaj Nacioj pri ekonomia kaj socia evoluo (angle)
| ||||||||||||||||
