Tahitio
El Vikipedio, la libera enciklopedio
Tahitio estas la plej granda insulo en Franca Polinezio, situanta en la arkipelago de Societa Insularo en la suda Pacifiko, je 17° 40′ S; 149° 30′ U Mapo. La insulo havas loĝantaron de 169.674 personoj (2002) kaj areon de 1.036 km². La ĉefurbo estas Papeete, je la nordokcidenta marbordo. Tahitio historie ankaŭ nomiĝis Otaheite.
Geologie Tahitio konsistas el du montoj krude konusformaj, starantaj en oceano; ili estas ligitaj per la terkolo de Taravao. La partoj nomiĝas respektive Tahiti Nui (Granda Tahitio) kaj Tahiti Iti (Malgranda Tahitio); la pinto de la pli granda parto estas monto Oroheno, alta 2.241 metrojn.
Biogeografie la insulo troviĝas en la Pacifika ekozono laŭ la tipologio de la Monda Natur-Fonduso (WWF).
