Alfred Butts
Alfred Mosher BUTTS (naskiĝis la 13-an de aprilo 1899 en Poughkeepsie (Nov-Jorkio), mortis la 4-an de aprilo 1993 en Novjorko) - usona arkitekto, elpensinto de la tabulludo skrablo.
Komence de la tridekaj jaroj de la 20-a jc. spertanta senlaborecon Alfred Butts decidis elpensi novan tabulludon. Analizante la ekzistantajn ludojn, li dividis ilin je tri kategorioj: nombraj ludoj, kiel bingo aŭ ĵetkuboj, taktikaj ludoj, kiel ŝako aŭ damludo, kaj vortaj ludoj, kiel anagramoj. Krome li inspiris sin per vortludo priskribita en la rakonto The Gold-Bug (La ora skarabo) de Edgar Allan Poe, en kiu la ĉefrolanto devis deĉifri la kriptaĵon, helpante sin per scio pri literofteco. Utiligante ĉi tiun konon Butts strebis krei ludon, kiu enhavus elementojn de ĉiuj tri menciitaj kategorioj. Analizante frontpaĝojn de The New York Times, li kalkulis aperoftecon de ĉiuj literoj de la angla lingvo, por fiksi la ĝustan nombron de koncernaj literoj en la ludkompleto (ekzemple la litero S, kiu servas por formi pluralon de substantivoj kaj triapersonan prezencon de verboj aperas kvarfoje sur tegoloj de la ludkompleto). La principoj estis simplaj. El la speciale preparita literkompleto ludantoj lotumis po sep literojn kaj strebis kunmeti per ili laŭeble altpoentajn vortojn.
Komence Butts nomi sian ludon „Lexiko”, poste li ŝanĝis la nomon al „Criss Cross Words” kaj ekserĉis aĉetonton de patento por ĉi tiu ludo. Tamen ludproduktistoj ne montris intereson pri la projekto kaj fine Butts decidis vendi rajtojn al la ludo al entreprenisto kaj juristo James Brunot. Tiu enkondukis kelkajn modifojn kaj nomis la ludon „Scrabble” (palpserĉi). En 1948 la ludo estis patentita kaj Butts kune kun sia edzino transformis forlasitan lernejsidejon en Dodgington (Konektikuto) je fabriko de „Scrabble”. En 1949 ili produktis 2400 ludkompletojn. Nuntempe sole en Usono oni vendas ĉirkaŭ du milionojn da kompletoj jare.