Baziliko Santa Maria Novella
La baziliko Santa Maria Novella (itale Basilica di Santa Maria Novella) estas preĝejo en Florenco (Italio). Ĝi situas proksime al la samnoma, ĉefa stacidomo de la urbo. Kronologie, ĝi estis la unua grava baziliko de Florenco, kaj estas la ĉefa dominikana preĝejo de la urbo.
La preĝejo, la apuda klostro kaj la kapeloj entenas grandan kvanton da altvaloraj artaĵoj, sed ankaŭ multajn tombmonumentojn. Precipe famaj estas la freskoj fare de gotikaj kaj renesancaj majstroj. Ili estis financitaj danke al la mecenatoj de la plej riĉaj florencaj familioj, kiuj tiel rajtiĝis akiri tombon ene de unu el la funebraj kapeloj.