Novodeviĉe-tombejo

El Vikipedio, la libera enciklopedio

55° 43′ 29″ N 37° 33′ 15″ O / 55.72472 °N, 37.55417 °O / 55.72472; 37.55417 (mapo)

Monda heredaĵo de UNESKO
Enirejo en la Malnovan terenon

La Novodeviĉe-tombejo estas la plej malnova kaj ampleksa nekropolo en Rusio. Ĝi situas en la suda parto de Moskvo nomata Luĵniki, proksime de Moskva rivero. En 2010 ĝia areo okupis 7,5 hektarojn, kie troviĝas restaĵoj de 26 000 personoj.

En la 16-a jarcento apud la Novodeviĉij-monaĥinejo (ruse Новодевичий Богородице-Смоленский женский монастырь) de la Rusa Ortodoksa Eklezio aperis tombejo por tieaj mortintaj monakinoj. Iom post iom ĝi pligrandiĝis kaj okupis teritoriojn ekster la klostraj muroj. Nuntempe ĝiaj kvar terenoj nomiĝas: Malnova, Nova, Plinova kaj Plejnova.

Krom tomboj mem tie estas ankaŭ granda kolumbario kun mortocindraj urnoj.

La tombejo estas tre prestiĝa kaj dediĉita ĉefe por eminentaj civitanoj de Rusio. Tie interalie estas enterigitaj korpoj de la eksa gvidinto de Sovetunio Nikita Ĥruŝĉov kaj la unua prezidento de Rusia Federacio Boris Jelcin. Multaj mortintaj politikistoj, verkistoj, artistoj k.a. troviĝas tie, kiaj Sergej Miĥajloviĉ Ejzenŝtejn, Sergio Aksakov, Nikolaj Gogol, Nikolaj Ostrovskij. Kelkaj monumentoj dediĉitaj al la mortintoj estas gravaj montroj de arto, kiaj tiuj de Miĥail Bulgakov, Anton Ĉeĥov, Nikolaj Gogol, Vladimir Majakovskij, Sergej Prokofjev, Boris Jelcin.

La eniro de la tombejo estas libera dum certa tempo, tial pluraj vizitantoj povas vidi la luksajn tomboŝtonojn faritajn de elstaraj geskulptisoj kaj rememori gravajn eventojn koncerne iun ajn personon.

La teritorio de la Novodeviĉe-tombejo en Moskvo estas listigita en Monda Heredaĵo de UNESKO kiel objekto #1097. Ĝi estas ankaŭ objekto de Rusia kultura heredaĵo #7710525000.

Eksteraj ligiloj[redakti | redakti fonton]