World Community Grid
| World Community Grid | |
|---|---|
| Kampo: | scienco |
| Celo: | ebligi sciencan esploradon kiu profitigas la homaron |
| Faranto: | |
| Lando: | internacia |
| Platformo: | BOINC |
| Retejo: | www |
| Projekta statuso | |
| Statuso: | aktiva |
| Komenco: | 16-a de novembro 2004 |
La World Community Grid (WCG; Esperante: Monda Komunuma Reto) estas organizaĵo kiu celas krei la plej grandan voluntulan komputadan platformon en la mondo por fari sciencan esploradon kiu profitigas la homaron. Ĝi lanĉiĝis la 16-an de novembro, 2004, kun proprieta kliento Grid MP (en) de United Devices (en), aldonis subtenon por Berkeley Open Infrastructure for Network Computing (BOINC) (en) en 2005, kaj fine ĉesigis la klienton Grid MP kaj koncentriĝis en la platformo BOINC en 2008. En septembro 2021, oni anoncis ke IBM transdonis la proprieton al Krembil Research Institute (en) de University Health Network (en) en Toronto, Ontario.
La World Community Grid uzas nebezonatan komputan kapablon de konsumaparatoj (personaj komputiloj, tekokomputiloj, androidaj saĝtelefonoj, ktp) por analizi datumojn kreitajn de esplorgrupoj kiuj partoprenas en la reto. Projektoj de WCG analizis datumojn rilatajn al la homa genaro, la homa mikrobiomo, HIV, dengo, muskola distrofio, kancero, gripo, Ebola, Zika-viruso, virtuala taksado de eblaj farmaciaĵoj (en), rizrikoltaj rendimentoj, senpolua energio, purigado de trinkakvo kaj KOVIM-19, inter aliaj esplorkampoj.
Aktuale, (en aŭgusto 2024), estas kvin aktivaj projektoj [1] kaj dudek ses finitaj projektoj.[2] Pluraj el tiuj projektoj publikigis kolegreviziitajn artikolojn bazitajn sur la analizo de la datumoj generitaj per WCG, inkluzive de artikolo de la Mikrobiomimuneca Projekto kiu esploras proteinojn similajn en sinsekvo kiuj funkcias malsimile; [3] artikolo de la Projekto OpenZika pri la malkovro de kemia kombinaĵo (FAM E3) kiu malhelpas proteinon de la Zika-viruso, tiel reduktante virusan replikadon je ĝis 86%; [4] artikolo de FightAIDS@home pri la malkovro de novaj vundebloj sur la HIV-1 kapsida proteino kiuj eble permesos novan drogcelon; [5] kaj artikolo de FightAIDS@home pri novaj komputaj drogmalkovraj teknikoj por pli rafinitaj kaj precizaj rezultoj. [6]
Ekde la 14-a de aŭgusto, 2024, World Community Grid havis pli ol 16,000 aktivajn uzantkontojn, kun pli ol 41,000 aktivaj aparatoj.[7] Dum la kurso de la projekto, pli ol 2,500,000 akumulaj jaroj da komputika tempo estis donacitaj, kaj pli ol 7 miliardoj da rezultoj estis revenitaj.[8]
Referencoj
[redakti | redakti fonton]- ↑ Active Research. Alirita 2024-08-01.
- ↑ Completed Research. Alirita 2024-08-01.
- ↑ Research update from the Microbiome Immunity Project team (May 2023). Alirita 2024-08-02.
- ↑ Synthetic Compound May Be Useful for Developing Zika Virus Treatment. Alirita 2024-08-02.
- ↑ FightAIDS@Home – Phase 1 researchers identified new potential targets for antivirals. Alirita 2024-08-02.
- ↑ FightAIDS@Home Team's New Simulation Technique Published in Industry Journal. Alirita 2024-08-02.
- ↑ World Community Grid - Detailed stats. Alirita 2024-08-14.
- ↑ Global statistics. Alirita 2024-08-14.